Իսրայելի ռազմաքաղաքական կառավարությունը որոշել է երուսաղեմյան Տաճարի լեռան մուտքերի մոտից մետաղորսիչները հանել, որոնք տեղական արաբամուսուլմանական համայնքի զանգվածային բողոքներ էին հրահրել, «ՌԻԱ Նովոստի»-ի փոխանցմամբ՝ հայտնել են Իսրայելի վարչապետ Բենիամին Նեթանյահուի գրասենյակից:
Պարբերականի տեղեկություններով՝ մետաղորսիչների շրջանակները կփոխարինեն տեսախցիկներով, որոնք արդեն մոնտաժվել են իսլամի՝ նշանակությամբ երրորդ սրբավայրի վրա, որտեղ հնագույն հրեական տաճարների ավերակների վրա վեր են խոյացել Ալ Աքսա եւ Քուբաթ աս Սահրա մզկիթները:
«Ռազմաքաղաքական կառավարությունը ուժային բոլոր կառույցներին հրահանգել է անվտանգության միջոցառումներ ներդնել՝ հիմնված մետաղորսիչների փոխարեն առաջավոր տեխնոլոգիաների, «խելացի» ստուգումների, ինչպես նաեւ այլ միջոցների վրա, որպեսզի ապահովվի այցելուների եւ Հին քաղաքում ու Տաճարի լեռան մոտ աղոթողների անվտանգությունը»,- նշված է Իսրայելի առանցքային նախարարների համաժողովի հերթական նիստի արդյունքներով տարածած հաղորդագրության մեջ:
«Մինչեւ այս ծրագրի իրականացումը Իսրայելի ոստիկանությունը իր ստորաբաժանումները կուժեղացնի անհրաժեշտության դեպքում լրացուցիչ գործողություններ կատարելու համար, որպեսզի ապահովի Լեռ այցելողների անվտանգությունը»,- նշված է փաստաթղթում:
Տեղական լրատվամիջոցների տեղեկություններով՝ խցիկները կարողանում են տարբերակել անձը, բացահայտել կասկածելի պահվածքը, այդ թվում՝ զենք եւ պայթուցիկ փոխադրելու փորձերը:
