«Նուբարաշեն» քրեակատարողական հիմնարկը միջանցքներից սկսած՝ նկուղային հարկերում պատժախցերից վերջացրած վտանգավոր է մարդկանց առողջության եւ կյանքի համար: Այս մասին հայտարարել է ԱԺ «Ելք» խմբակցության պատգամավոր Լենա Նազարյանը, ով օրերս «Ելք» խմբակցության պատգամավոր Գեւորգ Գորգիսյանի հետ այցելել էր «Նուբարաշեն» ՔԿՀ եւ հանդիպել Գեւորգ Սաֆարյանին:
«Այդ հիմնարկում կոյուղի գոյություն չունի: Կեղտաջրերը հոսում են հիմնարկի նկուղ ու հավաքվում շենքի տակ: Բոլորը խոսում են միայն բանտախցերում պահվող դատապարտյալների կյանքի ու առողջության անվտանգության մասին, բայց ոչ պակաս կարեւոր է նաեւ այդ հիմնարկում ծառայություն իրականցնող անձնակազմի առողջությունը եւ աշխատանքային պայամանների հարցը: Տեսա թե ինչպես են հսկիչները ժամերով գտնվում չօդափոխվող, գարշահոտ սենյակներում, միջանցքներում ու իրականացնում ծառայություն: Այդ հիմնարկը նաեւ նրանց համար է պատժախուց»,- գրել է նա Facebook-ի իր էջում:
Ավելի վաղ NEWS.am-ը հայտնել էր, որ Գեւորգ Գորգիսանն ու Լենա Նազարյանը նախօրեին հանդիպել են արդարադատության նախարար Դավիթ Հարությունյանին` քաղբանտարկյալ Գեւորգ Սաֆարյանի խնդրի հետ կապված, որի արդյունքում նախարարը խոստացել էր լուծում տալ խնդրին։
