15-ամյա հանդբոլիստ Դավիթ Հովակիմյանի սպանության մեջ մեղադրվող Կարեն Կունգուրցեւը, որը 7 տարվա ազատազրկման է դատապարտվել, դադարեցել է հուլիսի 21-ից սկսած հացադուլը: Այս մասին այսօր՝ հուլիսի 22-ին, NEWS.am-ը տեղեկացավ նրա շահերի պաշտպան Արայիկ Պապիկյանից: Նա նշեց, որ Կարեն Կունգուրցեւին տեսակցել է երեկ, նա հայտարարություն է փոխանցել, որում իր ազատազրկման համար մեղադրում է Վերաքննիչ դատարանի դատավորներ Մանուշակ Պետրոսյանին, Մհեր Արղամանյանին եւ Մխիթար Պապոյանին:
«Իմ ապօրինի ազատազրկման մեղավորները Վերաքննիչ դատարանի դատավորներ Մանուշակ Պետրոսյանը, Մհեր Արղամանյանը եւ Մխիթար Պապոյանն են: Նրանք պատվերով խորտակում են իմ ճակատագիրը, թաքցնում են 15-ամյա Դավիթի սպանություն կատարողին, նրանք խորտակում են նաեւ իմ 2 ամսական Դավիթի ճակատագիրը: Ես անմեղ եմ, իրենք լավ գիտեն, բայց «մեղավոր եմ, որ չունեմ հովանավոր եւ կաշառքի փող»,-ասված է հայտարարությունում:
Հիշեցնենք, որ Լոռու մարզի առաջին ատյանի դատարանը հանցակազմի բացակայության հիմքով արդարացրել էր Կարեն Կունգուրցեւին եւ ազատ արձակել դատական նիստերի դահլիճից, սակայն, Վերաքննիչ դատարանի դատավճռով նա 7 տարվա ազատազրկման է դատապարտվել:
