«Սասնա ծռեր» խմբի անդամ Արայիկ Խանդոյանին՝ («Միայնակ գայլ») բժիշկները հետազոտության են ենթարկել հենց «Նուբարաշեն» ՔԿՀ-ում՝ իր իսկ խցում: Այս մասին NEWS.am-ի հետ զրույցում ասաց նրա շահերի պաշտպան Արայիկ Պապիկյանը: Նա նշեց, որ թեեւ Երեւանի Ավան եւ Նոր Նորք վարչական շրջանների ընդհանուր իրավասության դատարանում տեղի ունեցած միջադեպից հետո ՔԿՀ ղեկավարությունից պահանջել էին Արայիկ Խանդոյանին հետազոտության ենթարկել համապատասխան բուժհաստատությունում՝ պարզելու ինչ վնասվածքներ ու առողջական խնդիրներ ունի նա, սակայն, արվել է ճիշտ հակառակը:
«Դա հետազտություն չի կարելի անվանել: Մի քանի օր առաջ բժիշկներ են եկել մոտը, գործիքային հետազոտություն չի եղել, զննել, զրուցել են հետն ուղղակի: Այսինքն՝ ընդամենը այցելություն է եղել նրան»:
Արայիկ Պապիկյանը նշեց, որ Արայիկ Խանդոյանն ունի գլխացավեր, երիկմների ցավ, սրտխառնոց:
Հիշեցնենք, որ Երեւանի Ավան եւ Նոր Նորք վարչական շրջանների ընդհանուր իրավասության դատարանի խցում «Սասնա ծռեր» խմբի անդամներ Արայիկ Խանդոյանը, Արեգ Կյուրեղյանը, Սմբատ Բարսեղյանը եւ Մխիթար Ավետիսյանը ծեծի էին ենթարկվել: Պաշտպաններն ահազանգել էին, որ իրենց պաշտպանյալները մարմնական վնասվածքներ են ստացել: Ավելի ուշ ՀՔԾ-ում քրեական գործ հարուցվեց, ըստ մամուլի տեղեկությունների, դատարանում ամբաստանյալներին ծեծի ենթարկելու օպերացիան ղեկավարել է փոխգնդապետ Արմեն Ղազարյանը:
