Զբոսաշրջիկներն ավելի հաճախ են Հայաստան ժամանում՝ տոլմայի եւ խորովածի փառատոններին մասնակցելու համար: Հուլիսի 25-ին լրագրողների հետ հանդիպմանն այս մասին հայտարարեց ՀՀ տնտեսական զարգացման եւ ներդրումների նախարարության զբոսաշրջության պետական կոմիտեի պետի տեղակալ Մեխակ Ապրեսյանը:
Նրա հավաստմամբ՝ բազմաթիվ են ինչպես արտերկրից ժամանած, այնպես էլ տեղացի զբոսաշրջիկները: «Մեզ համար միատեսակ կարեւոր են երկուսն էլ, եւ այն, որ փառատոններն անցկացվում են մարզերում: Նման տոնական օրերին աշխուժանում են ոչ միայն կոնկրետ քաղաքը կամ գյուղը, այլ ամբողջ շրջանը»,- հավելեց պաշտոնյան:
Գինու, խորովածի, տոլմայի, գաթայի եւ այլ փառատոններն ավելի հաճախ են ներառվում տուրփաթեթներում (գինու փառատոնը կազմակերպվում է հոկտեմբերին Արենիում, տոլմայինը՝ մայիսի վերջին, խորովածինը՝ օգոստոսին Ախթալայում): «Բազմաթիվ զբոսաշրջիկներ նաեւ առանձին են գալիս, ինչը, իհարկե, ուրախացնում է մեզ»,- հավելեց Մեխակ Ապրեսյանը:
