Հարվարդի համալսարանի Վիսի ինստիտուտի ինժեներների խումբը ծալվող ռոբոտներ է մշակել, որոնք գործարկվում են արտաքին մագնիսական դաշտի միջոցով, հայտնում է Science Robotics ամսագիրը:
Ինչպես նշում է N+1-ը, նախկինում ներկայացվածներից այս օրիգամ ռոբոտների տարբերակիչ առանձնահատկությունն այն է, որ դրանց մասերը հնարավոր է կառավարել առանձին՝ որոշակի բնութագրերով մագնիսական դաշտի միջոցով: Ռոբոտների ծալվածքներում մանրակերտ էլեկտրական սխեմաներ եւ զսպանակներ են ամրացված՝ ձեւի հիշողության համաձուլվածքով: Սովորական վիճակում, երբ թերթն ուղղված է, այս զսպանակները ձգված են, բայց տաքացնելիս դրանք կարճանում են մկանների նման եւ կառուցվածքին ստիպում ծալվել:
Տաքացման աղբյուր է համարվում արտաքին մագնիսական դաշտը, որը հոսանք է ստեղծում «մկանների» էլեկտրական շղթաներում: Ըստ որում՝ յուրաքանչյուր տարր, որը պատասխանատու է կոնկրետ ծալվածքի համար, գործարկվում է որոշակի հաճախականությամբ փոփոխական մագնիսական դաշտի միջոցով:
Այս տեխնոլոգիայի ցուցադրման համար հետազոտողները ռոբոտի 3 նախատիպ են ստեղծել: Առաջինը եռանկյունի էր, որի յուրաքանչյուր նիստին եւս մեկ եռանկյունի կար: Երկրորդ նախատիպը մանիպուլյատոր էր հիշեցնում, իսկ երրորդ նախատիպը շշի մեջ առագաստով կառավարվող նավի մանրակերտն էր:
