Սպառազինության ավելի քան կեսը, որը վաճառվում է ստվերային համացանցում, ԱՄՆ-ից է մատակարարվում, վկայում են Մանչեսթերի համալսարանի եւ RAND Europe կենտրոնի տվյալները, փոխանցում է «ՌԻԱ Նովոստի»-ն:
Նշվում է, որ ստվերային համացանցային շուկայում վաճառվող ամբողջ հրազենի 60 տոկոսը ԱՄՆ-ից է մատակարարվում: Եվս 25 տոկոսը բաժին է ընկնում եվրոպական երկրներին, չի հաջողվել պարզել մնացած հրազենի ծագումը:
Հաշվետվությունում նշվում է, որ ստվերային համացանցում վաճառվող սպառազինությունը հազիվ թե օգտագործվի լիամասշտաբ զինված հակամարտություններում կամ մատակարարվի ահաբեկչական խմբավորումներին: Այդուհանդերձ, այս հարթակները հասանելի են միայնակ ահաբեկիչներին, որոնք ինքնուրույն կամ փոքր խմբերով են գործում:
Հետազոտության ընթացքում ուսումնասիրվել են համացանցային 12 հարթակներ, որոնցում հրազեն եւ պայթուցիկ են վաճառում, ինչպես նաեւ տնային պայմաններում դրանք պատրաստելու հրահանգներ:
