ԱՄՆ նախագահ Դոնալդ Թրամփը կատակել է, որ ամերիկացի օրենսդիրները, որոնք քննում են իր շրջապատի եւ Ռուսաստանի միջեւ իբր եղած «կապերը», կարող են իր 11-ամյա որդուն՝ Բերոնին, ստիպել այս գործով ցուցմունք տալ: Այս մասին ԱՄՆ նախագահը երեքշաբթի գրել է Twitter-ի իր էջում, փոխանցում է ՏԱՍՍ-ը:
Կոնգրես կանչելու դեպքում, հեգնում է Թրամփը, աշակերտ Բերոնը կդառնար իր փեսա Ջարեդ Քուշներից հետո ընտանիքի երկրորդ անդամը, ով ցուցմունք է տվել. Քուշները երկուշաբթի ելույթ է ունեցել ԱՄՆ Կոնգրեսի Սենատի հետախուզության հատուկ կոմիտեի փակ լսումներում:
«Ջարեդ Քուշները երեկ հրաշալի ապացուցեց, որ նա ռուսների հետ դավադրության մեջ չի մտել,- գրել է Թրամփը: - Սա վհուկների որս է: Հերթում հաջորդը 11 տարեկան Բերոն Թրամփն է»:
Սենատի կոմիտեի առջեւ իր ցուցմունքում ԱՄՆ նախագահի ավագ խորհրդական եւ փեսա Ջարեդ Քուշները երկուշաբթի հերքել է Ռուսաստանի հետ «դավադրությանը» մասնակցությունը: Նա հստակեցրել է, որ իսկապես հանդիպել է ՌԴ մի քանի ներկայացուցիչների հետ, այդ թվում՝ «Վնեշէկոնոմբանկի» ղեկավար Սերգեյ Գորկովի հետ: Սակայն Քուշները հայտարարել է, որ ինքը ռուսական միջոցների հույս է ունեցել մասնավոր հատվածում իր գործունեության ֆինանսավորման համար:
Երեք ամուսնություններից նախագահ Դոնալդ Թրամփը 5 երեխա ունի. 3 որդի՝ 39-ամյա Դոնալդ կրտսերը, 33-ամյա Էրիկը եւ 11-ամյա Բերոնը, ինչպես նաեւ 2 դուստր՝ 35-ամյա Իվանկան (ամուսնացած է Ջարեդ Քուշների հետ) եւ 23-ամյա Թիֆանին:
