Թուրքիայի խորհրդարանում պատգամավորների ներքին կանոնակարգի նախագծի քննարկումների ժամանակ ընդդիմադիր «Ժողովրդահանրապետական» (CHP) կուսակցության պատգամավոր Օզգյուր Օզելը յուրահատուկ բողոքի ակցիա է իրականացրել։

Թուրքական BirGun–ի փոխանցմամբ՝ CHP–ի պատգամավոր Օզգյուր Օզելը խիստ քննադատության է ենթարկել պատգամավորների խոսքի ազատությանն ուղղված ներքին կանոնակարգի նախագիծը քննարկման դնելը։ Նա ի նշան բողոքի մոտեցել է եւ սեւ կտոր է փռել ամբիոնի վրա։ Սրանով պատգամավորը ցանկացել է ցույց տալ խոսքի ազատության մահը Թուրքիայում։

Նշենք, որ ներքին կանոնակարգում արված փոփոխություններով   թուրք ժողովրդի պատմությունն ու Թուրքիայում ապրող ժողովուրդների ընդհանուր անցյալը վիրավորելու և մեղադրանքներ ներկայացնելու դեպքում պատժամիջոցներ կիրառելու դրույթներ են նախատեսվում։ Մասնավորապես, նման դեպքում պատգամավորներին կարող են նիստերից հեռացնել եւ զրկել աշխատավարձի 2/3-ից: Այս համատեքստում «ցեղասպանություն» եւ «Քուրդիստան» բառերը կարող են պատժի պատճառ դառնալ։