Ամենայն Հայոց Կաթողիկոս Գարեգին Բ-ին, այսօր՝ հուլիսի 25-ին, շնորհվել է Գրական փաստագրության միջազգային ակադեմիայի «Ոսկե մեդալ»:

Մայր աթոռի տեղեկատվական համակարգից NEWS.am-ին հայտնում են, որ Գարեգին Բ-ն Մայր Աթոռ Սուրբ Էջմիածնում ընդունել է Գրական փաստագրության միջազգային ակադեմիայի պատվիրակությանը` գլխավորությամբ ՌԴ վաստակավոր իրավաբան, ակադեմիայի նախագահ Վալերի Նարինյանի: Այցի նպատակն էր Ամենայն Հայոց Կաթողիկոսին հանձնել Գրական փաստագրության միջազգային ակադեմիայի նախագահության որոշմամբ Վեհափառ Հայրապետին շնորհված «Ոսկե մեդալը»:

«Ձերդ Սրբություն, դուք քրիստոնեական շարժման ականավոր գործիչ եք: Մենք բարձր ենք գնահատում Ձեր ներդրումը հայ-ռուսական հարաբերությունների ամրապնդման գործում: Դա վկայությունն է Ռուսաստանի եւ Հայաստանի ժողովուրդների եղբայրության` հիմնված միեւնույն քրիստոնեական արժեքների վրա», - նշեց ակադեմիայի նախագահը` Նորին Սրբությանը փոխանցելով ակադեմիայի պարգեւը:

Շնորհակալություն հայտնելով ակադեմիայի շնորհած պարգեւի համար` Նորին Սրբությունն իր օրհնությունը փոխանցեց պատվիրակության անդամներին: Ամենայն Հայոց Կաթողիկոսը բարձր գնահատեց կազմակերպության գործունեությունը` ուղղված հոգեւոր-մարդասիրական արժեքների տարածմանը: Հայոց Հայրապետը մասնավոր անդրադարձ կատարեց նաեւ ակադեմիայի կողմից Հայոց Ցեղասպանության վերաբերյալ լույս ընծայած աշխատություններին` ընդգծելով նման հրատարակությունների կարեւորությունը նման հանցագործությունների կանխարգելման գործում:

Գարեգին Բ Կաթողիկոսը մաղթեց ակադեմիայի նախագահ Վալերի Նարինյանին եւ ակադեմիայի անդամներին Աստծո առաջնորդությունը իրենց բարի եւ օգտաշատ նախաձեռնություններում եւ արգասավոր գործունեություն:

Հանդիպմանը ներկա էին Մայր Աթոռի դիվանապետ Գերաշնորհ Տ. Արշակ եպիսկոպոս Խաչատրյանը եւ Վարչա-տնտեսական բաժնի տնօրեն Գերաշնորհ Տ․ Մուշեղ եպիսկոպոս Բաբայանը։