Եվրասիական տնտեսական միության բարձրագույն ղեկավարությունը քննարկման առարկա կդարձնի Ռուսաստանի Դաշնությունում հայկական վարորդական իրավունքով աշխատելու հնարավորության հարցը: Այս մասին NEWS.am-ի հետ զրույցում նշել է ՀՀԿ խմբակցության պատգամավոր Սամվել Նիկոյանը:
Անդրադառնալով «Ելք»-ի պատգամավոր Էդմոն Մարուքյանի առաջարկին, ըստ որի Հայաստանը պետք է ԵՏՄ-ից դուրս գալու գործընթաց սկսի, Սամվել Նիկոյանն ասաց, որ նման ծայրահեղ հայտարարություններ անելու հարցում ազատ են այդ միության մասին այլ կարծիք ունեցողները, սակայն դա չի նշանակում, որ դուրս գալու գործընթաց պետք է սկսվի: ՀՀԿ-ական պատգամավորն ընդգծեց, որ ցանկացած միությունում էլ կարող են քաղաքական հարցերի շուրջ տարաձայնություններ լինեն:
«Եթե լիներ որեւէ որոշում, որը վերաբերեր բոլոր երկրներին, ապա կարելի էր մտածել եւ այդ ժամանակ քննարկել հետեւյալ հարցը՝ ԵՏՄ-ն ենթադրում է աշխատուժի, կապիտալի ազատ տեղաշարժ, արդյոք տվյալ որոշումը համապատասխանո՞ւմ է այդ հիմնարար սկզբունքներին, թե ոչ: Բայց էստեղ խնդիրը այլ դաշտում է: Ըստ էության, դրա դիմաց դրվում է հետեւյալ շեշտադրումը՝ բացի այն երկրներից, որոնց պաշտոնական լեզուն ռուսերենն է: Ստացվում է՝ տնտեսական պահանջ՝ քաղաքական խնդիր լուծելու համար: Ենթադրվում էր, որ այդ խնդիրը պետք է բուռն արձագանքի արժանանար եւ այդ հարցը պետք էր դարձնել քննարկման առարկա: Իհարկե, որոշակի բացասական շեշտադրումներով, բնական է, որ այդպիսի գնահատական պետք է լիներ Հայաստանում եւ եթե որոշ քաղաքական ուժեր ծայրահեղ ձեւով են արտահայտում իրենց դիրքորոշումը, դա իրենց խնդիրն է, իրենց իրավունքն է»,-ընդգծեց Նիկոյանը:
Հարցին՝ իրեն չի՞ վրդովեցնում, երբ տնտեսական խոչընդոտներով քաղաքական լուրջ հարցեր են փորձում լուծել, պատգամավորը պատասխանեց. «Ցանկացած միություն, այդ թվում Եվրասիական տնտեսական միությունը մի միջավայր է, որ անընդհատ կարող են ծագել խնդիրներ: Չկա մի միջավայր, որտեղ խնդիրներ չառաջանան, որոնց դեմ իշխանությունը քայլեր կարող է անել: Այս խնդրի շուրջ արձագանքը բնական էր, բայց պետք է հստակ հասկանանք, որ ոչ առաջինն էր, ոչ էլ վերջինը: Ես չեմ կարծում, որ այդ հարցը վերջնական լուծված է, ես կարծում եմ, որ այն դեռեւս քննարկման առարկա կարող է դառնալ ԵՏՄ բարձրագույն մարմնում: Այս խնդիրը դեռեւս դառնալու է օրակարգային հարց ԵՏՄ բարձրագույն մարմնում»:
Չնայած ՌԴ-ում աշխատող հայ վարորդների համար ստեղծված խոչընդոտին եւ Հայաստանում ռուսերենը պաշտոնական լեզու ընդունելու առաջարկին՝ իշխանության ներկայացուցիչը շարունակում է պնդել, որ ԵՏՄ-ին անդամագրվելու դրական արդյունքը Հայաստանում ակնհայտ է. «Կարծում եմ, որ ԵՏՄ արդյունավետությունը մեր երկրի համար ակնհայտ է եւ կան լայն հնարավորություններ, որոնք պետք է կարողանանք օգտագործել: ԵՏՄ-ն մի համակարգ է, որտեղ կարող ես լավ աշխատել եւ քո խնդիրները լուծել, երկրորդը յուրաքանչյուր միություն մեջ էլ կարող են առաջանալ խնդիրներ»:
Հիշեցնենք, որ ՌԴ Պետդումայում վերջերս օրենսդրական փոփոխություն ընդունվեց, ըստ որի Հայաստանի վարորդական իրավունքը Ռուսաստանում չի ճանաչվելու: Այս փոփոխությունը վերաբերում է ԵՏՄ անդամ երկրներից միայն Հայաստանին, քանի որ մեր երկրում ռուսերենը պաշտոնական լեզու չէ: Որպեսզի խնդիրը հարթվեր, ՌԴ Պետդումայի խոսնակը ՀՀ Աժ նախագահի գլխավորած պատվիրակությանը Ռուսաստան կատարած այցի ժամանակ առաջարկել էր ռուսերենն ընդունել որպես պաշտոնական լեզու: Այս առաջարկը թեեւ չէր ընդունվել, սակայն թեման բուռն քննարկվեց, ավելին «Ելք», դաշինքի պատգամավոր Էդմոն Մարուքյանը հայտարարեց, որ պետք է Հայաստանը ԵՏՄ-ից դուրս գալու գործընթաց սկսի: