Հայաստանում արեւային խոշոր էլեկտրակայանի շինարարությունը կսկսվի 2018 թվականի սկզբին: Այս մասին հուլիսի 26-ին՝ լրագրողների հետ հանդիպման ժամանակ հայտնեց էներգետիկ ենթակառուցվածքների եւ բնական պաշարների փոխնախարար Հայկ Հարությունյանը:
Նրա խոսքով՝ շինարարության մրցույթի մասնակիցների մասնագիտական ընտրությունը հայտարարվել է տարեսկզբին: 20 հայտերից ընտրվել է 10-ը: Մրցույթը կսկսվի սեպտեմբերին: 2017-ի վերջին կընտրվի ամենաձեռնտու սակագինը: Նա, ով այն կառաջարկի, 55 ՄՎտ հզորությամբ կայանը կկառուցի Գեղարքունիքի մարզի Մասրիկ տեղանքում:
Մրցույթի երկրորդ փուլ են անցել Չինաստանի, Նիդեռլանդների, Հարավային Աֆրիկայի, Հարավային Կորեայի, Հնդկաստանի, Հունաստանի, Լիբանանի, Արաբական Միացյալ Էմիրությունների, Իսպանիայի, Ֆրանսիայի, Իտալիայի ընկերությունները (դրանց մի մասը միավորված են կոնսորցիումների մեջ):
Երկրի իշխանությունները հույս ունեն ցանց մտնելու այնքան ցածր սակագին ստանալ, որպեսզի այն կողմնորոշիչ դառնա մյուս ապագա կայանների համար: Օրինակ՝ վերջին մրցույթներից մեկի ժամանակ Դուբայում մրցույթով ստացվել է 2,4 ցենտ կՎտ/ժամի համար, այսինքն՝ գործնականում էներգիայի ավանդական աղբյուրների մակարդակում (համեմատության համար՝ Հայկական ԱԷԿ-ի էլեկտրաէներգիայի սակագինը կազմում է 1,4 ցենտ): Հայաստանում արդեն 10 ՄՎտ-ի քվոտա է հատկացվել փոքր (մինչեւ 1 ՄՎտ) կոմերցիոն փոքր արեւային կայանների շինարարության համար, սակայն ավելի բարձր սակագնով՝ առանց ԱԱՀ-ի 42,6 դրամ կՎտ/ժամի համար (8,8 ցենտ): «Մենք ցանկանում ենք արեւային էներգիան զարգացնել ավելի ցածր սակագներով: Սակայն ինչ-որ բանից սկսելու համար արտոնյալ սակագին ենք առաջարկել: Այն կստանան ընկերությունները, որոնք քվոտայի սահմաններում առաջինն են հայտ ներկայացրել»,- պարզաբանեց Հարությունյանը: