Իջեւանում աներոջը սպանելու համար 10 տարվա ազատազրկման դատապարտված Արթուր Շահինյանի դատավճիռը մտել է ուժի մեջ:
Չնայած Շահինյանն ու իր պաշտպան Աշոտ Գեւորգյանը պնդում էին, որ մեղադրանքը պետք է վերաորակվի, Վերաքննիչ բողոք չի ներկայացվել:
Ավելի վաղ Աշոտ Գեւորգյանը մեզ հետ զրույցում մասնավորապես ասել էր. «Դատական ակտն ըհդհանրապես չհիմնավորված է, ոչ մի ապացույց չկա, որ դիտավորյալ սպանություն է տեղի ունեցել: Իմ պաշտպանյալն ի սկզբանե ասում է, որ ընդամենն ուզեցել է վախեցնել, չի ցանկացել սպանել, ինչպե՞ս կարող էր դիտավորյալ սպանել իր կնոջ հորը, երեխաների պապիկին: Սպանելու ոչ մի պատճառ չի եղել, մեղադրանքը պետք է վերաորակվեր անպայման»:
Հիշեցնենք, որ 2016թ. օգոստոսի 16-ին սպանություն է տեղի ունեցել Տավուշի մարզում։ Ժամը 08։40-ի սահմաններում Իջեւանի հուշաղբյուրներից մեկի մոտ հայտնաբերվել է հրազենային վնասվածքով տղամարդու դի։ Ոստիկանությունն ու քննիչները պարզել են, որ մահացածը նույն քաղաքի Թավրիզյան 60 տան բնակիչ, 50-ամյա Վաչագան Ակինյանն էր։ Ի դեպ, սպանվածն աշխատում էր ջրամբարում եւ աշխատանքի գնալիս է եղել, երբ փեսան հետապնդել եւ սպանել է նրան: