Լոռու մարզի Արդվի գյուղում, որտեղ ուզում են ոսկու հանք բացել, գտնվում են արոտավայրեր, խմելու ջուրը նույնպես այնտեղից է գալիս: Այս մասին NEWS.am-ին ասաց «Ելք» խմբակցության պատգամավոր Գեւորգ Գորգիսյանը, որը դաշինքի այլ անդամների հետ այսօր գտնվում է Արդվիում՝ ոսկու հանքի վերաբերյալ հանրային լսումներին մասնակցելու նպատակով:
«Արդվի գյուղը հայտնի է իր պատմամշակութային վայրերով՝ 7-րդ դարի եկեղեցի, հեթանոսական ժամանակներից մնացած գերեզման, այլ եկեղեցիներ: Եվ այժմ 7-րդ դարի եկեղեցուց մի քանի մետր հեռավորության վրա ցանկանում են ոսկու հանք բացել: Այնտեղ են գտնվում արոտավայրերի մեծ մասը, խմելու ջուրն է այնտեղից գալիս: Հանքը բացելը կնշանակի ավերել այս գյուղը»,- ասաց պատգամավորը:
Գորգիսյանը պատմեց, որ այսօր իրենք Արդվի էին գնացել հանրային լսումներին մասնակցելու համար, գյուղացիները, սակայն, փակել են ճանապարհը եւ թույլ չեն տվել մտնել գյուղ:
«Նախ ժամանողները եկան մոտ 40-50 րոպե ուշացումով, գյուղացիները որոշեցին ներս չթողնել, գյուղի մոտ փակեցին ճանապարհը, տարօրինակ մեքենաներ սկսեցին գալ՝ «Գազպրոմի», ՌԴ դեսպանատան համարանիշներով, մարդիկ հայտարարեցին, որ տուրիստներ են: Ներկաներն էլ սկսեցին պահանջներ ներկայացնել, թե հարմար սենյակներ տրամադրեք լսումների համար եւ այդպես էլ լսումները չեղան»,- ասաց Գեւորգ Գորգիսյանը:
Նշենք, որ ըստ «Հետք»-ի՝ ոսկու հանքը բացվում է Վահրամ Բաղդասարյանի հովանավորչությամբ: