Առաջիկա օրերին պաշտոնական այցով Հայաստանում է գտնվելու Կանզաս նահանգի ազգային գվարդիայի գեներալ-ադյուտանտ, գեներալ-մայոր Լի Թաֆանելին: Այցի շրջանակում Լի Թաֆանելին հանդիպում կունենա ՀՀ ԱԻ նախարար Դավիթ Տոնոյանի հետ, ինչպես նաեւ՝ նախարարն ու գեներալը միասին կհետեւեն երկօրյա համատեղ վարժանքներին:
ԱԻՆ-ից NEWS.am-ին հայտնում են, որ հուլիսի 27-ին, ժամը 12.00-ին ՀՀ ԱԻ նախարար Դ. Տոնոյանը եւ Կանզաս նահանգի ազգային գվարդիայի գեներալ-ադյուտանտ, գեներալ-մայոր Լի Թաֆանելին ներկա կլինեն ՀՀ Շիրակի մարզի Ախուրյան քաղաքի հրշեջ-փրկարարական ջոկատին կից վարժահրապարակում անցկացվող վարժանքին:
Սցենարի համաձայն՝ ավտոմեքենան, կորցնելով կառավարումը, բախվել է Ախուրյանի ԲԿ լաբորատորիայի պատին, որտեղ վտանգավոր նյութեր կան: Բախման հետեւանքով մեքենայում հրդեհ է բռնկվել, շենքի պատը փլուզվել, կան «տուժածներ»:
Հաջորդ օրը՝ հուլիսի 28-ին, ժամը 10.00-ին ՀՀ Կոտայքի մարզում (գյուղ Արգել) գտնվող «Լուսակերտ» ուսումնական կենտրոնի վարժահրապարակում ՀՀ ԱԻ նախարար Դ. Տոնոյանը եւ գեներալ-մայոր Լի Թաֆանելին կհետեւեն հատուկ տակտիկական ուսումնավարժությանը, որին ներկա կլինեն նաեւ ՀՀ-ում ԱՄՆ դեսպան Ռիչարդ Միլսը եւ Մեծ Բրիտանիայի դեսպան Ջուդիթ Մարգարեթ Ֆարնուորթը:
Ուսումնավարժության թեման է՝ «Քլոր տեղափոխող բեռնատար եւ մարդատար երկու գնացքների վթարի հետեւանքով ստեղծված իրավիճակում քիմիական, ճառագայթային մոնիթորինգի, հրդեհաշիջման եւ փրկարարական աշխատանքների իրականացումը եւ առաջին բուժօգնության ցուցաբերումը»: