Արմավիրի մարզի Արեւիկ գյուղի բնակիչներն արդեն մեկ ամսից ավելի է՝ ոռոգման ջուր չունեն. իրենց բերքը չորանալուց փրկելու համար ստիպված են ոռոգման ջուրը գնել: NEWS.am-ի հետ զրույցում արեւիկցիները պատմեցին, որ վերջին անգամ իրենց հողատարածքները կարողացել են մեկ ամիս առաջ ջրել, այն դեպքում, երբ դրանք անհրաժեշտ է ամեն օր մշակել եւ ջրել:
«Արազի ու Ախուրյանի ջուրը չորացավ, էլ ջուր չենք տեսել: Նորատունկ խաղողի այգիս արեւի տակ չորացավ, թափվեց: Չորացած այգում թողել ենք, որ խոտը բարձրանա, գոնե հողը մի քիչ խոնավ պահի»,-ասում է Նաիրա Ասատրյանը:
Արեւիկցի Մռազ Սահիբյանն էլ վերջապես կարողացել է գումար գտնել ոռոգման ջրի համար եւ վերջին մեկ ամսվա ընթացքում այօր առաջին անգամ խաղողի այգին է ջրում:
«Խաղողի այգի ունեմ, վարունգ, սմբուկ եմ աճեցնում: Վարունգը մի անգամ կարողացանք ջրել, վաճառել, հետո արեւից վառվեց, թափեցինք: Խորքային հորերից ջուր են բերում, գումարի դիմաց տալիս են՝ ջրում ենք: Ով ի վիճակի է՝ մուծում է անում, կարողանում է արտը ջրի, ով չէ՝ չորանում է բերքը: Ես իմ խաղողի այգին ջրելու համար 63 հազար դրամ եմ վճարելու, 45-ը տվել եմ, մնացած գումարը դեռ չեմ կարողացել տալ»:
Մեկ ամիս առաջ արեւիկցիները փակել էին Արմավիր-Երեւան ճանապարհը, նրանք պահանջում էին լուծել ոռոգման ջրի հարցը, մինչեւ այժմ նրանց խնդրին լուծում չի տրվել: