Արմավիրի մարզի Արեւիկ գյուղի բնակիչները հավաքած բերքը ստիպված են շուկայականից ցածր գնով վաճառել: NEWS.am-ի հետ զրույցում արեւիկցիները պատմեցին, որ վարունգը, սմբուկն ու ձմերուկը թափելուց խուսափելու համար՝ վաճառում են էժան, քանի որ մթերման գործարաններ չկան: «Համարյա ձրի տալիս ենք: Այնպես չէ, որ այնքան բերք ունենք, որ չենք հասցնում վաճառել ու թափում ենք, ուղղակի, քանի որ մթերման գործարաններ չկան, նորմալ շուկա չկա, ստիպված ենք ճանապարհներին, փողոցներին վաճառել էն գնով, որով ուզում են: Թե չէ մնալու է՝ թափենք: Վարունգի առաջին բերքի հետ հենց էդպես էլ եղավ, հավաքեցինք, չվաճառվեց, թափեցինք»,-պատմեց գյուղացիներից Մռազ Սահիբյանը:
Նա նշեց, եթե անցած տարի սմբուկի մեկ կիլոգրամը վաճառել են 50-100 դրամով, այս տարի ստիպված են վաճառել կիլոգրամը 20 դրամով. «Մշակելու ծախսն անգամ դուրս չի գալիս, մի բան էլ մենք ենք գումար դնում, որ տանենք, վաճառենք: Ձմերուկն էլ կիլոգրամը 50 դրամով ենք վաճառում, բայց քաղաքում 100-150 դրամ է: Մարդիկ հավաքել են բերքը, չեն կարողացել վաճառել, թափում են»: