Ռուսաստանի Դաշնությունում դատապարտված եւ մեկ շաբաթ առաջ Հայաստան տեղափոխված Հրաչյա Հարությունյանին այսօր՝ հուլիսի 26-ին, տեսակցել են նրա ընտանիքի անդամները:
NEWS.am-ին Հրաչյա Հարությունյանի կինը՝ Անահիտ Հարությունյանը, հայտնեց, որ ամուսինը լավ տրամադրություն է ունեցել, քրեակատարողական հիմնարկի պայմաններից գոհ է:
«Հրաչյան ասաց, որ եթե Հայաստանում եմ, ուրեմն շատ լավ եմ: Առողջությունն էլ ոչինչ, նորմալ է»,- ասաց տիկին Անահիտը:
Հրաչյա Հարությունյանը հուլիսի 20-ին տեղափոխվել է Հայաստանի Հանրապետություն՝ «Դատապարտյալների փոխանցման մասին» 1983թ. եվրոպական կոնվենցիայով սահմանված կարգով պատժի մնացած մասը կրելու համար:
Հիշեցնենք, որ Հրաչյա Հարությունյանը 6 տարի 9 ամիս ժամկետով ազատազրկման էր դատապարտվել: 2013 թվականի հուլիսին Հրաչյա Հարությունյանը Պոդոլսկի մերձակայքում բեռնատարով բախվել էր ուղեւորատար ավտոբուսին, ինչի հետեւանքով 18 մարդ էր զոհվել, ավելի քան 60 մարդ տարբեր աստիճանի վնասվածքներ էր ստացել:
