Օդեսայի նախկին նահանգապետ Միխայիլ Սահակաշվիլիին Ուկրաինայի քաղաքացիությունից զրկել են: Այս մասին Facebook-ի իր էջում գրել է «Ռադիկալ կուսակցությունից» ընտրված պատգամավոր Իգոր Մոսիյչուկը: «Սա ճիշտ է՝ վրացական յանուկովիչին՝ Միխո Սահակաշվիլիին, զրկել են ուկրաինական քաղաքացիությունից, եւ սա վկայում է, որ նախագահ Պյոտր Պորոշենկոն վերջապես սկսեց ընդունել սեփական սխալները: Նա ապօրինի կերպով էր մեր քաղաքացիությունը տրամադրել եւ հիմա ուղղում է բացառապես սեփական սխալները»,- գրել է նա:
Հիշեցնենք, որ ավելի վաղ հաղորդվել էր, որ Ուկրաինան 2 անգամ Վրաստանին մերժել է այս երկրի նախկին նախագահ Միխայիլ Սահակաշվիլիին արտահանձնել: «Ես ուրախ եմ, որ մեր ուկրաինացի գործընկերների տեղեկությունները ճշտվել են. այո, ճիշտ է, որ մենք 2 անգամ Վրաստանի գլխավոր դատախազությունից պաշտոնապես դիմել ենք ուկրաինական կողմին՝ խնդրելով հանձնել Սահակաշվիլիին, եւ 2 անգամ պաշտոնական մերժում ենք ստացել»,- հայտարարել է Վրաստանի արդարադատության նախարար Թեա Ծուլուկիանին:
