Ոստիկանությունում հետաքննություն է կատարվում Երեւանի «ԷսՎի» հյուրանոցում օրեր առաջ տեղի ունեցած դեպքի առթիվ:
NEWS.am-ին ոստիկանության լրատվական ծառայությունից հայտնեցին, որ դեպքի վերաբերյալ հուլիսի 18-ին հաղորդում են ստացել, որի հիման վրա հետաքննություն է կատարվում:
«Ոստիկանության Շենգավիթի բաժնում հաղորդում է ստացվել, որ Վարազդատ Աղայանը հուլիսի 18-ին մուտք է գործել «ԷսՎի» հյուրանոցային համալիր եւ իր ենթադրյալ իրավունքներն իրականացնելով՝ տիրացել հաղորդում տվողի՝ ի պահ տրված շարժական գույքին: Հաղորդման հիման վրա հետաքննություն է կատարվում»,- հայտնեցին ոստիկանությունից:
Հաղորդում տվողը Վարազդատ Մանուկյանն է, որն այդ հյուրանոցային համալիրի սեփականատերն է:
Ավելի վաղ «Փաստ» թերթը դեպքի վերաբերյալ գրել էր. «Մի խումբ մարդիկ մուտք գործելով հյուրանոց, հարձակվել են աշխատակիցների վրա, նրանց ուժով դուրս շպրտել շենքից ու գրավել հյուրանոցը: «Զորախմբի» գրոհը ղեկավարել է Ոստիկանությունից ժամանակին հեռացված գնդապետ Վարազդատ Ադամյանը (նա համակարգից հեռացվել էր Թամամյանի «գործով»): Արդեն մեկ շաբաթ է, ինչ անօրինականորեն Ադամյանը աշխատեցնում է հյուրանոցը»:
