Հոկտեմբերին Հայաստանը ԱՄՆ-ին կրկին կառաջարկի կնքել կրկնակի հարկման դեմ պայմանագիրը: Այս մասին հուլիսի 27-ին՝ կառավարության նիստից հետո լրագրողների հետ զրույցում ասաց ֆինանսների նախարար Վարդան Արամյանը:
Նրա խոսքով՝ ամերիկյան կողմը նշում է, որ նման պայմանագրի բացակայությամբ իր ընկերությունների համար դժվարություններ չի տեսնում: Այսուհանդերձ, չնայած հնարավոր է, որ նկատելի դժվարություններ չկան, սակայն հարկերը կրկնակի վճարելու հեռանկարը կարող է շատ պոտենցիալ ներդրողների վախեցնել: Ով ոչ ոք չգիտի, թե ամերիկյան քանի ընկերություններ են դրա պատճառով հրաժարվել Հայաստանում աշխատելուց (կամ հայկականները՝ ԱՄՆ-ում): Սա հայկական կողմի հակափաստարկն է:
Արամյանը նշեց, որ կրկնակի հարկման դեմ պայմանագրով նախատեսվում է, որ հարկման միեւնույն օբյեկտը (գործարքը, շահույթը, եկամուտը) կարող է միայն մեկ անգամ հարկվել: Այլ խոսքով՝ եթե արտասահմանում աշխատող հայկական ընկերությունը հարկվել է, ապա Հայաստանում արդեն չեն կարող երկրորդ անգամ հարկել (եւ հակառակը): Միակ դեպքը, երբ սա հնարավոր է, հետեւյալն է՝ եթե արտասահմանյան հարկը տեղականից ցածր է, ապա կարելի է տարբերությունը պահանջել (օրինակ՝ եթե Ռուսաստանում եկամտահարկը 13 տոկոս է, իսկ Հայաստանում՝ 24,4 տոկոս, Հայաստանը կարող է 11,4 տոկոսը հարկել):
Հայաստանն այսպիսի պայմանագրեր է կնքել արդեն 47 երկրների հետ, այս տարի վերջինը Իսրայելն է եղել: Իսկ հունիսին երկիրը նման պայմանագրերին ավելի լավ պատրաստված դարձավ, քանի որ միացավ BEPS-ի (Տնտեսական համագործակցության եւ զարգացման կազմակերպության նախաձեռնություններ) 15-րդ գործողությանը: Այս Գործողությունը հնարավորություն է տալիս միատեսակ մեկնաբանել կրկնակի հարկման դեմ պայմանագրերը: «Նշանակում է՝ երկիրն ավելի կանխատեսելի պայմանագրային գործընկեր է դառնում: Հոկտեմբերին մենք ցանկանում ենք ԱՄՆ հետ պայմանագրի հարցը կրկին բարձրացնել՝ այս փաստարկը հաշվի առնելով»,- ամփոփեց ֆինանսների նախարարը: