Իսրայելական «Եշ Ատիդ» ընդդիմադիր կուսակցության առաջնորդ Յաիր Լապիդը կոչ է արել ճանաչել Հայոց ցեղասպանությունն եւ սատարել քրդական պետության կազմավորումը՝ ի պատասխան Թուրքիայի նախագահ Էրդողանի պահվածքի:
Լրագրողների հետ զրույցում Լապիդը նշել է, որ Թուրքիան ամեն անգամ ավելի ու ավելի ցավոտ է հարվածում Իսրայելին, գրում է Jerusalem Post-ը:
«Մենք պետք է ասենք՝ լավ, հասկացանք, հիմա մենք մեր քաղաքականությունը կունենանք: Այս պահից մենք սատարում ենք քրդական անկախ պետության ստեղծումն ու պետք է ճանաչենք Հայոց ցեղասպանությունը: Մենք պետք է անենք այն ամենը, ինչ չենք արել, երբ լավ հարաբերություններ ունեինք Թուրքիայի հետ, քանի որ այլեւս դրանք չունենք եւ չենք ունենա ապագայում»,- հայտարարել է ընդդիմադիր գործիչը:
Յաիր Լապիդը նաեւ կոչ է արել հրաժարվել դեպի Թուրքիա գազային խողովակաշարի գաղափարից:
Հիշեցնենք, որ ավելի վաղ Ռեջեփ Թայիփ Էրդողանը խորհրդարանում ունեցած ելույթում բոլոր մահմեդականներին կոչ էր արել այցելել Տաճարի լեռ եւ պաշտպանել Ալ Աքսան այնպես, ինչպես Մեքքան եւ Մեդինան:
