Անհրաժեշտ է ուսումնասիրել վիզային ռեժիմի ազատականացմամբ նոր զբոսաշրջիկների ներգրավելու հնարավորությունը: Այս մասին հուլիսի 27-ին՝ կառավարության նիստում հայտարարեց վարչապետ Կարեն Կարապետյանը:
Նա ԱԳ նախարար Էդվարդ Նալբանդյանին եւ Տնտեսական զարգացման ու ներդրումների նախարարության Տուրիզմի պետական կոմիտեի նախագահ Զարմինե Զեյթունցյանին հանձնարարեց այս հնարավորություններն ուսումնասիրել:
Իսկ կառավարությանն առընթեր Քաղաքացիական ավիացիայի գլխավոր վարչության ղեկավար Սերգեյ Ավետիսյանին վարչապետը հանձնարարեց վերստին ուսումնասիրել տոմսերի գները եւ շուկայի զարգացման միտումները, որից հետո համապատասխան առաջարկներ ներկայացնել: Հանձնարարությունների կատարման համար վարչապետը մեկ ամիս հատկացրեց:
«Տարվա առաջին ամիսներին զբոսաշրջիկների հոսքի կտրուկ աճ էր նկատվել: Սակայն դրա հետ միաժամանակ զբոսաշրջիկների ներգրավման նոր համալիր միջոցառումներ են անհրաժեշտ»,- հավելեց վարչապետը:
