Ամենայն Հայոց Կաթողիկոս Գարեգին Բ-ն հուլիսի 27-ին Մայր Աթոռ Սուրբ Էջմիածնում ընդունել է Հայաստանում Ռուս Ուղղափառ Եկեղեցու համայնքների կառավարիչ, Վլադիկովկասի եւ Ալանիայի Լեոնիդ եպիսկոպոսին:
Մայր աթոռից NEWS.am-ին հայտնում են, որ զրույցի ընթացքում անդրադարձ է կատարվել Հայաստանյայց Առաքելական եւ Ռուս Ուղղափառ Եկեղեցիների միջեւ առկա ջերմ հարաբերություններին եւ համագործակցությանը: Մասնավորապես խոսվել է Հայաստանում Ռուս Եկեղեցու համայնքների հոգեւոր կյանքի կազմակերպմանն առնչվող հարցերի եւ գործակցության ապագա ծրագրերի մասին:
Հանդիպման ավարտին Ամենայն Հայոց Կաթողիկոսը Նորին Սրբություն Կիրիլ Պատրիարքին փոխանցեց եղբայրական իր սերն ու ողջույնները:
Իր հերթին Լեոնիդ եպիսկոպոսը շնորհակալություն հայտնեց Ամենայն Հայոց Հայրապետին` մշտապես ցուցաբերվող հոգատարության եւ ուշադրության համար:
Հանդիպմանը ներկա էին Մայր Աթոռի Վարչա-տնտեսական բաժնի տնօրեն Գերաշնորհ Տ. Մուշեղ եպիսկոպոս Բաբայանը եւ Միջեկեղեցական հարաբերությունների բաժնի տնօրեն Հոգեշնորհ Տ. Շահե ծայրագույն վարդապետ Անանյանը: