ՀՀ Սյունիքի մարզի ընդհանուր իրավասության դատարանը հուլիսի 26-ին շարունակել է լսել զինծառայող Գեւորգ Խաչատրյանին ինքնասպանության հասցնելու գործով վկաներին: ՀՔԱՎ Գրասենյակից հայտնում են, որ այսօրվա նիստին արցաքննվել են վկաներ Ալբերտ Սարգսյանը եւ Կորյուն Մանուկյանը: Գեւորգ  Խաչատրյանի մյուս ծառայակից Սերգեյ Դավթյանը, որը եւս դատակոչվել էր որպես վկա, չէր ներկայացել:

Նրանք եւս նախաքննական ցուցմունքներին հակասող ցուցմունքներ տվեցին, դա պատճառաբանեցին նախաքննության ընթացքում հոգեպես ճնշված վիճակում գտնվելով, եւ նշեցին, որ նախաքննության փուլում որոշ ցուցմունքներ տվել են քննիչի ուղղորդմամբ:

Վկա Ա. Սարգսյանը հայտնեց, որ իրավաբանի հետ խորհրդակցելուց հետո հասկանալով, որ կարող է փոխել նախաքննական ցուցմունքները, որոշել է  առերեսման ժամանակ հայտնել իրականությունը: Մեղադրանքի կողմի միջնորդությամբ հրապարակվեցին վկայի նախաքննական ցուցմունքները, որից հետո կողմերը հակասությունների վերաբերյալ հարցեր ուղղեցին:

Վկա Կ. Մանուկյանն էլ հայտնեց, որ քննիչն իրեն ինչ-որ թուղթ է բերել փորձաքննության արդյունքների վերաբերյալ եւ ասել, որ դա կարող է հիմք լինել իր նկատմամբ քրեական գործ հարուցելու համար, ինչի հետեւանքով ինքը ճնշվել է: Բայց հետո իրավաբանների հետ խորհրդակցել ու հասկացել է, որ դա քրեական գործ հարուցելու հիմք չի կարող լինել:

Դրանով մեկնաբանեց առերեսման ժամանակ ցուցմունքները փոխելու հանգամանքը: Բացի դրանից՝ նշեց, որ քննիչը հորդորել է պնդել խոհանոցում տեղի ունեցած դրվագներից մեկի վերաբերյալ իր ցուցմունքը՝ ասելով, որ հակառակ դեպքում դրա մասին իր ցուցմունքում նշած Ա. Անտոնյանը կարող է սուտ ցուցմունք տալու համար քրեական պատասխանատվության ենթարկվել:

Այս վկայի ցուցմունքները եւս հրապարակվեցին, հնչեցին հակասությունների հետ կապված հարցադրումներ: Դատարանը նաեւ որոշում կայացրեց պատշաճ ծանուցված վկա Ս. Դավթյանին բերման ենթարկելու մասին եւ գործի դատաքննությունը հետաձգվեց ու նշանակվեց 2017 թ.  օգոստոսի 21-ին՝ ժամը 10:00-ին:

 Հիշեցնենք՝ հարուցված քրեական գործի շրջանակում մեղադրանք է առաջադրվել ուղեկալի պետ, կապիտան Մհեր Ոսկանյանին (ՀՀ քրեական օրենսգրքի 364.1 հոդվածի երկրորդ մասով, 375 հոդվածի առաջին մասով, 360 հոդվածի երկրորդ մասով), ուղեկալի ավագ, ենթասպա Հովիկ Քալաշյանին  (ՀՀ քրեական օրենսգրքի 364.1 հոդվածի առաջին մասով, 375 հոդվածի առաջին մասով), ինչպես նաեւ ժամկետային զինծառայող Հարություն Մուրադյանին (ՀՀ քրեական օրենսգրքի 359 հոդվածի երկրորդ մասի 2-րդ կետով, 364.1 հոդվածի առաջին մասով՝ երկու դրվագով եւ 359 հոդվածի երրորդ մասով):