ԱՄՆ կոնգրեսական Ադամ Շիֆը շարունակում է ակտիվորեն համագործակցել Ամերիկայի Հայ դատի հանձնախմբի հետ (ANCA) Հայաստանի պետական դպրոցներում կրթական, տեխնոլոգիաների, ինժեներիայի եւ մաթեմատիկայի ոլորտում «Հազարամյակի մարտահրավերների» դրամաշնորհին աջակցելու շուրջ:
«Վրաստանին վերջերս տրամադրված «Հազարամյակի մարտահրավերների» 140 մլն դոլար դրամաշնորհի հաջողությունը կարող է օրինակ ծառայել Հայաստանի հետ համանման կրթական փաթեթի համար, քանի որ երկրի IT ոլորտում նկատելի է տնտեսական կտրուկ աճ»,- նշել է ANCA-ի նախագահ Րաֆֆի Համբարյանը:
Նրա կարծիքով՝ «Հազարամյակի մարտահրավերների» շրջանակում 100,000,000 դոլար կամ ավելի ներդրումները կհանգեցնեն աղքատության կրճատմանը, տնտեսական հնարավորությունների ստեղծմանը, ԱՄՆ-ի ու Հայաստանի միջեւ կապերի խորացմանը եւ կօգնեն ապագա սերունդներին:
«2006 թվականին «Հազարամյակի մարտահրավերների» շրջանակում Հայաստանի ստացած առաջին դրամաշնորհը շատ հաջող էր: Ավելի քան 170 մլն դոլարի ներդրում է տրամադրվել գյուղական վայրերում աղքատությունը կրճատելու համար»,- ասել է Շիֆի ներկայացուցիչը՝ հավելելով, որ եկել է նոր դրամաշնորհի հարմար ժամանակը՝ նախատեսված կրթության համար, որը Հայաստանին կօգնի հաջորդ քայլը կատարել դեպի տնտեսական կայուն աճ եւ աճող միջին խավ:
«Վերջին շաբաթվա ընթացքում ես շատ եմ զրուցել Ամերիկայի Հայ դատի հանձնախմբի ղեկավարության եւ հայկական դեսպանատան հետ այս կարեւոր նախագծի առաջընթացի մասին, եւ բոլոր շահագրգիռ կողմերի հետ սերտ համագործակցությունը շարունակելու հույս ունեմ, որպեսզի համոզված լինենք, որ Հայաստանը բոլոր անհրաժեշտ միջոցառումները ձեռնարկում է»,- նշել է Շիֆը:
Կոնգրեսի եւ վարչակազմի հետ քննարկումներին զուգահեռ՝ ANCA-ն բանակցություններ է վարել «Հազարամյակի մարտահրավերների» շրջանակում Հայաստանի հետ գործընկերությամբ շահագրգռված ամերիկյան համալսարանների հետ:
