Ժիրայր Սեֆիլյանի եւ մյուսների գործով դատական նիստն այսօր՝ հուլիսի 28–ին հետաձգվեց պաշտպանների՝ նիստին ներկա չգտնվելու պատճառով։

NEWS.am-ի թղթակիցը հաղորդում է, որ ամբաստանյալ Ներսես Պողոսյանի պաշտպան Նինա Կարապետյանցին դատական կարգադրիչները արգելեցին ներս մտնել, քանի որ վերջինս  հրաժարվում էր խուզարկության ենթարկվել։

Դատական կարգադրիչները փաստաբանից պահանջում էին բացել պայուսակը եւ ցույց տալ իրերը, քանի որ մետաղորսիչ սարքը զննության ժամանակ ազդանշաններ էր արձակում։  Նինա Կարապետյանցը հրաժարվեց բացել պայուսակը, ինչի պատճառով կարգադրիչները թույլ չտվեցին  մտնել  նիստերի դահլիճ։

Այս գործով դատավոր Տաթեւիկ Գրիգորյանը  դատական սանկցիա հայտարարեց  պաշտպան Նինա Կարապետյանցի նկատմամբ եւ պաշտպանների ներկա չգտնվելու հիմքով հետաձգեց նիստը մինչեւ մյուս ուրբաթ օրը։

Նշենք, որ ամբաստանյալները եւս ներկա չէին նիստին։