Առաջիկայում Հայաստանի Գյուղատնտեսության նախարարության Սննդամթերքի անվտանգության պետական ծառայությունը կպատրաստի Ռուսաստան ապխտած մսամթերքի արտահանմանը վերաբերող եզրակացությունը: Այս մասին հուլիսի 28-ին՝ լրագրողների հետ հանդիպման ժամանակ ասաց ծառայության անասնաբուժական տեսչության ղեկավար Հովհաննես Մկրտչյանը:
Հում (ջերմամշակման չենթարկվող) մսամթերքի եւ կաթնամթերքի վրա արգելք էր սահմանվել 2015 թվականի դեկտեմբերին Հայաստանում դաբաղի նոր տարատեսակի բռնկման պատճառով: 2016 թվականի սկզբին Ռուսաստանից անհրաժեշտ պատվաստանյութի խմբաքանակ են ստացել, եւ համաճարակը չեզոքացվել է: Այդուհանդերձ, Ռուսաստանի սանիտարական մարմիններն արգելքը հանելու համար սպասում էին մանրակրկիտ վերլուծության արդյունքներին:
Նշենք, որ հում միս (այդ թվում՝ թռչնամիս) Հայաստանից Ռուսաստան չի արտահանում: Սակայն արգելքը վերաբերում էր նաեւ ապխտած մթերքներին (բաստուրմային եւ սուջուխին): Այն արտահանվում էր Ռուսաստան, չնայած շատ փոքր ծավալներով:
Վերջին մի քանի ամիսներին փաստահավաքության նպատակով Հայաստան են ժամանել «Ռոսսելխոզնադզորի» ներկայացուցիչները: «Պետական ծառայության աշխատակիցները դաբաղի առկայության ստուգումներ են կատարել արյան հարյուրավոր նմուշներում, ըստ որում՝ ռուսաստանցի գործընկերների համար իրենց աշխատանքը լիովին հրապարակային են իրականացրել: Այդ պատճառով ստուգումների վերաբերյալ նրանց մոտ կասկածներ չեն առաջացել: Վերջնական եզրակացությունը պատրաստ կլինի առաջիկա օրերին»,- նշեց Մկիրտչյանը: