Բազմակողմանի, լրիվ եւ օբյեկտիվ քննությունը երաշխավորելու անհրաժեշտությամբ պայմանավորված՝ ՀՀ գլխավոր դատախազի կողմից ՀՀ հատուկ քննչական ծառայության քննիչի վարույթին է հանձնվել իշխանության ներկայացուցչի նկատմամբ բռնություն գործադրելու դեպքի առթիվ ՀՀ ոստիկանությունում հարուցված քրեական գործը:
ՀՔԾ-ից NEWS.am-ին հայտնում են, որ մասնավորապես, նախաքննության նյութերով ձեռք բերված տվյալների համաձայն, ՀՀ ոստիկանության ՊՊԳՎ Մալաթիայի պահպանության բաժնի ոստիկաններ Ս. Բ.-ն եւ Բ. Մ.-ն 17.07.2017թ.-ին «Մալաթիա» գյուղմթերքների շուկայում հասարակական կարգը խախտելու` հայհոյանքներ տալու եւ աղմկելու համար փորձել են կարգի հրավիրել ՀՀ քաղաքացի Ս. Ա.-ին, սակայն վերջինս չի ենթարկվել ոստիկանների օրինական պահանջներին եւ բռնություն է գործադրել Ս. Բ.-ի նկատմամբ` վնասելով վերջինիս պարանոցը:
Նյութերի նախապատրաստման ընթացքում Ս. Ա.-ն, իր հերթին, բացատրությամբ հայտնել է, որ ոստիկաններն են բռնություն գործադրել իր նկատմամբ` նախ պահանջել են դուրս գալ շուկայից, սակայն տեսնելով, որ պահանջը չի կատարվում, իրեն գցել են գետնին եւ ձեռքերով ու ոտքերով հարվածել` պատճառելով մարմնական վնասվածքներ:
Իշխանության ներկայացուցչի նկատմամբ բռնություն գործադրելու դեպքի առթիվ ՀՀ քրեական օրենսգրքի 316-րդ հոդվածի 1-ին մասի հատկանիշներով հարուցված քրեական գործի նախաքննությունը շարունակվում է ՀՀ հատուկ քննչական ծառայությունում:
