Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր՝ հուլսիի 31-ին, մեկնարկել է Սամվել Բաբայանի եւ մյուսների գործով դատական առաջին նիստը: NEWS.am-ի թղթակիցն հաղորդում է, որ դատարանում ուժեղացված հսկողություն է. ամբաստանյալի հարազատներին, փաստաբաններին եւ լրագրողներին դատարանի շենք են թողնում զննելուց հետո (ֆոտոռեպորտաժ)։
Նիստին չի ներկայացել ամբաստանյալներից Արմեն Պողոսյանի շահերի պաշտպան Վիկտորյա Կիրակոսյանը, սակայն Արմեն Պողոսյանը նշեց, որ դեմ չէ առանց իր պաշտպանի նիստը շարունակելու։ Այս պահին նիստը նախագահող դատավոր Արշակ Վարդանյանը ամբաստանյալներից ճշտում է նրանց ինքնությունը։ Սամվել Բաբայանից դատարանը հետաքրքրվեց՝ ծանոթ է արդյոք իրեն առաջադրված մեղադրանքին, ինչին Սամվել Բաբայանը պատասխանեց․ «Կարաք ոնց ուզեք ձեւակերպեք, էսօր որ ստեղ նստած եմ, իրենց արածն է, ես ի՞նչ կապ ունեմ»։
Ըստ մեղադրանքի՝ Սամվել Բաբայանը դրդել է մի խումբ անձանց` նախնական համաձայնությամբ ապօրինի կերպով ռազմամթերք հանդիսացող «Իգլա» տեսակի դյուրակիր զենիթահռթիռային համալիր ձեռք բերելուն, փոխադրելուն եւ պահելուն, ինչպես նաեւ փոխարկման արդյունքում ձեռք է բերել հանցավոր ճանապարհով ստացված գույք:
Սանասար Գաբրիելյանն ու Արմեն Պողոսյանը մի խումբ անձանց հետ` նախնական համաձայնությամբ ապօրինի կերպով ձեռք է բերել, փոխադրել եւ պահել ռազմամթերք հանդիսացող «Իգլա» տեսակի դյուրակիր զենիթահրթիռային համալիր:
Կարեն եւ Անդրանիկ Քոչարյաններին, Ժորա Զաքարյանին եւ Դավիթ Հարությունյանին էլ մեղադրանք է առաջադրվել այն բանի համար, որ նրանք օժանդակել են հանցավոր ճանապարհով ստացված գույքը` դրա հանցավոր ծագումը եւ իրական բնույթը խեղաթյուրելու եւ օրինական շրջանառության մեջ մտցնելու նպատակով ձեռք բերելուն:
Այսպիսով, հանցավոր ճանապարհով ստացված գույքն օրինականացնելու (փողերի լվացում), ինչպես նաեւ ապօրինի կերպով ռազմամթերք ձեռք բերելու, պահելու եւ փոխադրելու գործով անցնում են 7 մեղադրյալ, որոնցից երեքը՝ Սամվել Բաբայանը, Սանասար Գաբրիելյանը եւ Արմեն Պողոսյանը գտնվում են կալանքի տակ, իսկ մյուս չորսի նկատմամբ որպես խափանման միջոց է ընտրված չհեռանալու մասին ստորագրությունը:
