55-ամյա Ամո Խուդոյանը, որն Արագածոտնի մարզի Շամիրամ գյուղում սգո արարողության ժամանակ հրազենային վիրավորում էր ստացել, ծանր վիճակում «Արմենիա» բժշկական կենտրոն էր տեղափոխվել։ Նրան հիվանդանոց է տեղափոխել հարազատներից մեկը՝ Մանուկ Խուդոյանը։ Այս մասին NEWS.am-ի թղթակցի հետ զրույցում ասաց բժշկական կենտրոնի առաջին վիրաբուժական բաժանմունքի ղեկավար Խաչատուր Էյրամջյանը։
Նրա խոսքով՝ Ամո Խուդոյանն անմիջապես վիրահատարան է տեղափոխվել։ Բժիշկները պարզել են, որ նա ստամոքսի, ուղիղ եւ բարակ աղիքների, ստոծանու, ողնաշարի եւ ազդրերի հրազենային վնասվածքներ է ստացել։ Տղամարդու մոտ ներքին արյունահոսություն է սկսվել։ Խաչատուր Էյրամջյանն ասաց, որ նման վնասվածքները կյանքի հետ անհամատեղելի են։ Վիրավորը մահացել է վիրահատական սեղանին։
Նրա հարազատը՝ 40-ամյա Մանուկ Խուդոյանը, միկրովիրաբույժ Արա Մելիքսեթյանի խոսքով, միայն հիվանդանոցում է հասկացել, որ ինքը եւս վիրավոր է։ Նրա կրունկներից տեղային անզգայացմամբ հեռացվել են օտարածին մետաղական մարմինները։ Բուժօգնություն ստանալուց հետո տղամարդը լքել է հիվանդանոցը։
Հիշեցնենք, որ օգոստոսի 1-ին Արագածոտնի մարզի Շամիրամ գյուղում անհայտ անձը ներխուժել է գյուղի գերեզմանատան մոտ գտնվող սգո սրահ եւ ինքնաձիգով կրակ բացել մարդկանց ուղղությամբ։ Նախնական տվյալներով՝ վիրավորվել է 8 եւ զոհվել 4 մարդ, այդ թվում՝ Ամո Խուդոյանը։