Քաղաքացիությունից զրկված՝ Վրաստանի նախկին նախագահ ու Օդեսայի նախկին նահանգապետ Միխայիլ Սահակաշվիլին մտադիր է վերադառնալ Ուկրաինա։ Նման հայտարարություն է արել ԱՄՆ-ում գտնվող քաղաքական գործիչը մամուլի ասուլիսի ժամանակ, հայտնում է «Ստրանա ua»-ն։
«Ես չեմ թաքնվելու ԱՄՆ-ում։ Ես պարտադիր կվերդառնամ Ուկրաինա ու դատարանում կապացուցեմ իր իրավացիությունը։ Եթե իշխանությունը ինձնից չի վախենում՝ թող ինձ թույլատրի երկիր մտնել, իսկ եթե վախենում է․․ Դե ինչ, ես միեւնույն է կգտնեմ տունդարձի ճանապարհը»,- ասել է Սահակաշվիլին։
Սակայն վերադդարձի որոշակի ժամկետ նա չի հայտնել։ Ընդ որում խոստացել է դատարանում բողոքարկել իր ուկրաինական քաղաքացիության չեղարկման մասին հրամանագիրը, երկրի իշխանություններին մեղադրելով իրեն հետապնդելու մեջ։
Հիշեցնենք, որ Ուկրաինայի նախագահ Պյոտր Պորոշենկոն իր հրամանագրով Սահակաշվիլուն զրկել է քաղաքացիությունից։ Այդ որոշման պաշտոնական պատճառն այն է, որ քաղաքական գործիչն իր հարցաթերթիկում կեղծ տվյալներ էր նշել , ավելի որոշակիորեն՝ թաքցրել էր, որ իր դեմ Վրաստանում քրեական գործ է բացվել։