«Սասնա ծռեր» խմբի 18 անդամի գործով դատական նիստին այսօր՝ օգոստոսի 3-ին, միջադեպ է գրանցվել:
Երեւանի Ավան եւ Նոր Նորք վարչական շրջանների ընդհանուր իրավասության դատարանում փաստաբանները միջնորդեցին նիստերի դահլիճ բերել իրենց պաշտպանյալներին, քանի որ նրանց բացակայությամբ չեն կարող իրականացնել իրենց պարտականությունները: Երբ դատավոր Արտուշ Գաբրիելյանը մերժեց այդ միջնորդությունը, ամբաստանյալներից Արամ Մանուկյանը հայտարարեց, որ լքում է նիստերի դահլիճը, որից անմիջապես հետո դատավորը դատական սանկցիա կիրառեց նրա նկատմամբ եւ նույնպես հեռացրեց նիստերի դահլիճից: Այնուհետեւ հայտարարությամբ հանդես գալու փորձ կատարեց ամբաստանյալ Հովհաննես Հարությունյանը: Նրան նույնպես դատարանը հեռացրեց նիստերի դահլիճից՝ պատճառաբանելով, թե անհարգալից վերաբերմունք է դրսեւորել դատարանի նկատմամբ: Հարությունյանի պաշտպան Հայարփի Սարգսյանն արգելեց իր պաշտպանյալին հեռանալ դահլիճից՝ նշելով, որ այդ որոշումն օրինական չէ: Այդ ընթացքում, սակայն, ոստիկանները հրելով հեռացրին Հովհաննես Հարությունյանին:
Ամբաստանյալի մայրը, որը նիստին հետեւում էր ապակուց այս կողմ, վրդովվեց որդու նկատմամբ այդ վերաբերմունքից եւ աղմկելով սկսեց հարվածել ապակիներին: Նրան միացան դահլիճում գտնվող մյուս քաղաքացիները, որոնք սկսեցին ամոթանք տալ ոստիկաններին եւ դատավորին: Դահլիճում առկա լարված իրավիճակը ստիպեց Արտուշ Գաբրիելյանին: Նիստն ընդմիջվեց:
Քիչ առաջ վատացել է Հովհաննես Հարությունյանի մոր վիճակը: Նրան բուժօգնություն են ցուցաբերում: