Երեւանում Դավիթաշենի տներից մեկում օգոստոսի 2-ի երեկոյան տեղի ունեցած պայթյունի հետեւանքով տուժածներից 32-ամյա Նիկոլ Եփրեմյանը հիվանդանոցում մահացել է: Մյուս տուժածի՝ 20-ամյա Աշոտ Եփրեմյանի վիճակը ծայրահեղ ծանր է. նա անգիտակից վիճակում է, միացված է արհեստական շնչառության ապարատին: Աշոտ եւ Նիկոլ Եփրեմյաններն ազգականներ են՝ հորեղբոր որդիներ, նույն փողոցում էին բնակվում:

Դեպքի վայրի զննությամբ երկու հրետանային արկ է հայտրաբերվել, մեկը՝ մասնատված: Նախնական տվյալներով՝ երիտասարդները փորձել են սղոցել արկի գլխիկը, ինչի արդյունքում էլ այն պայթել է: Առայժմ հայտնի չէ, սակայն, թե ինչպես են նրանք ձեռք բերել արկերը:

Մոսկվայում հայերի եւ ուզբեկների միջեւ տեղի ունեցած զանգվածային ծեծկռտուքի հետեւանքով Հայաստանի երկու քաղաքացի է տուժել: Նրանք գլխուղեղի ցնցում եւ գլխի փափուկ հյուսվածքների վնասվածքներ են ստացել: Միջադեպին մասնակցել են Նոր Մոսկվայի շինհրապարակներից մեկում աշխատողները: Ռուսաստանի իրավապահների տեղեկացմամբ՝ զանգվածային ծեծկռտուքին շուրջ 60 մարդ է մասնակցել, մեծ մասը՝ Ուզբեկստանի եւ Հայաստանի քաղաքացիներ: Նրանք բահեր, մուրճեր եւ երկաթյա ձողեր են գործի դրել:

Կառավարությունը կարկուտից, ցրտահարությունից ու սելավներից տուժած գյուղացիական տնտեսություններին աջակցության տարբերակներ է փնտրում: Գործադիրի այսօրվա նիստում Կարեն Կարապետյանը հանձնարարել է միջոցներ ձեռնարկել՝ տարերային աղետներից տուժած հողօգտագործողներին հողի հարկը, ոռոգման ջրի վճարն ու պետական աջակցության ծրագրով տրամադրված սերմերի գումարը զիջելու նպատակով:

Առողջապահության նախարարությունն էլ ծխելու դեմ պայքարի հերթական միջոցներն է ձեռնարկում: Լեւոն Ալթունյանի խոսքով՝ մինչեւ նոյեմբեր ծխելու դեմ նոր օրինագծեր են ներկայացնելու: Կառավարության նիստում նախարարը ներկայացրել է ծխելու հետեւանքով առաջացող հիվանդությունների վտանգի մասին: Վարչապետն արձագանքել է:

Ջերմուկ հանգստավայրային քաղաքի համար կառավարությունը 2017 թվականին 2.5 մլն դոլար է հատկացնելու: Դավիթ Լոքյանն ասել է՝ փորձում են զարգացնել մարզերի քաղաքները: Դրանք նաեւ շրջակա գյուղերի եւ ավելի փոքր քաղաքների համար ձգման կետ են դառնալու՝ յուրովի մեգապոլիս: Վարչապետին այս բնորոշումը զվարճացրել է:

«Սասնա ծռեր»-ի 18 անդամի գործով այսօրվա դատական նիստում կրկին միջադեպեր եւ վիճաբանություններ են գրանցվել դատավորի եւ պաշտպանների միջեւ: Պաշտպանները դատավորին բոլոր ամբաստանյալներին դահլիճ բերելու միջնորդություն են ներկայացրել, սակայն դատավորը մերժել է:

Դրանից հետո Արամ Մանուկյանը հայտարարել է, որ լքելու է նիստը: Վերջինին ցանկացել է միանալ նաեւ Հովհաննես Հարությունյանն ու փորձել է հայտարարություն անել: Արտուշ Գաբրիելյանը դա դատարանի հանդեպ անհարգալից վերաբերմունք է համարել եւ պահանջել նրանց հեռացնել նիստերի դահլիճից: Հեռանալիս Հովհաննես Հարությունյանը ձեռնափայտը նետել է հատակին, ինչից հետո ոստիկանները նրան հրելով հեռացրել են: Հարությունյանի նկատմամբ ուժի կիրառումն իրարանցում է առաջացրել դահլիճում: Հովհաննեսի մայրը սկսել է ձեռքերով հարվածել ապակե պատնեշին, իսկ մյուս մասնակիցները ամոթանքներ են հնչեցրել:

Հովհաննես Հարությունյանի մոր ինքնազգացողությունը վատացել է, ժամանած շտապ օգնության բժիշկներն օգնություն են ցուցաբերել: Իսկ փաստաբան Հայարփի Սարգսյանը մարդու իրավունքների պաշտպանի ներկայացուցիչների է հրավիրել՝ հայտարարելով, որ իր պաշտպանյալի նկատմամբ բռնություն է կիրառվել: Օմբուդսմենի գրասենյակի ներկայացուցիչները հանդիպել են ամբաստանյալ Հովհաննես Հարությունյանի եւ ոստիկանների հետ: Ավելի ուշ դատավորը հայտարարել է, որ Հարությունյանի նկատմամբ բռնություն չի կիրառվել. Արտուշ Գաբրիելյանի պնդմամբ՝ Հովհաննեսն ինքն է այդ մասին ասել ՄԻՊ գրասենյակի ներկայացուցիչներին: Գործով դատական նիստը երկու շաբաթով հետաձգվել է:

ԱՄՆ նախագահ Դոնալդ Թրամփը ստորագրել է Ռուսաստանի, Իրանի ու Հյուսիսային Կորեայի դեմ նոր պատժամիջոցների մասին օրինագիծը: Չնայած դրան՝ նա հայտարարել է, որ օրինագիծը մի շարք թերություններ է պարունակում:

Կոնգրեսի կողմից օրինագծի հաստատմանն ի պատասխան՝ Մոսկվան հայտնել է Ռուսաստանից ամերիկացի դիվանագետների մի մասին արտաքսելու մասին: Մոսկվան նաեւ հայտարարել է, որ Ռուսաստանի դեմ նոր պատժամիջոցների մասին օրենքը շատ անհեռատեսական ու նույնիսկ վտանգավոր քաղաքական գիծ է: 

Պաշտոնական Թեհրանն իր հերթին հայտարարել է, որ Իրանն իրեն իրավունք է վերապահում պատասխանել ԱՄՆ-ի հակաիրանական պատժամիջոցներին։ Այստեղ նշել են, որ նոր պատժամիջոցների մասին օրենքը խախտում է Իրանական միջուկային ծրագրի շուրջ համատեղ գործողությունների համապարփակ ծրագիրը։

Դոնալդ Թրամփը ցանկանում է փոխել ԱՄՆ-ում կեցության իրավունք՝ գրին քարտ ստանալու կանոնները: Նա փոփոխությունների օրինագիծ է ներկայացրել, որով առաջարկում է չեղարկել «գրին քարտ» ստանալու վիճակախաղը: Թրամփը հայտարարել է, որ ԱՄՆ-ում կեցության իրավունք ստանալիս առավելություն կունենան անգլերենին տիրապետող օտարերկրացիները, նաեւ նրանք, որոնք ամերիկյան տնտեսությանն անհրաժեշտ մասնագիտական հմտություններ ունեն: ԱՄՆ նախագահը կարծում է, որ «գրին քարտ»-ի պատճառով երկրում ցածր եկամուտ ունեցող միգրանտներ են հայտնվում, որոնք ձգտում են սոցիալական նպաստ ստանալ: Նշենք, որ «Տարբեր ազգություններից միգրանտների համար վիզայի ծրագրով իմիգրացիա» ծրագիրն ԱՄՆ-ում գործում է 1990 թվականից:

ԱԻՆ-ը կոչ է անում մի քանի օր զերծ մնալ Դեբեդ գետում լողալուց: Օգոստոսի 16-18-ին վաղ առավոտից մինչեւ երեկո Լոռու մարզի Արեւածագ համայնքում գտնվող «ՁՈՐԱՀԷԿ»-ի ջրամբարի պատվարը բացվելու է՝ մաքրման աշխատանքների նպատակով: Արդյունքում Դեբեդի մակարդակը կարող է մինչեւ 2 մետր բարձրանալ: ԱԻՆ-ը խորհուրդ է տալիս նաեւ այդ ընթացքում խուսափել գետի ափամերձ տարածքներում ձկնորսությամբ, հողագործությամբ կամ այլ աշխատանքով զբաղվելուց:

Երեւանի «Փյունիկը» նոր մարզիչ ունի: Ակումբի նոր սեփականատեր Արթուր Սողոմոնյանը մեր թղթակցին հայտնել է, որ թիմը գլխավորելու է Մոսկվայի «Սպարտակ»-ի եւ «Դինամո»-ի նախկին ֆուտբոլիստ Ալեքսեյ Երյոմենկոն: Մինչ այդ, նա եղել է Կարագանդայի «Շախտյոր»-ի եւ ֆիննական «Յարո»-ի գլխավոր մարզիչը: Թիմում կաշխատեն նաեւ Արմեն Գյուբուդաղյանցն ու Արմեն Պետիկյանը: Ամենայն հավանականությամբ՝ «Փյունիկը» շուտով կանվանափոխվի: Հիշեցնենք, որ «Փյունիկ»-ի վաճառքի մասին լուրը հայտնվեց մայիսի վերջին: Ակումբը պատկանում էր Ֆուտբոլի ֆեդերացիայի նախագահ Ռուբեն Հայրապետյանին:

Օգոստոսի 3-ին դոլարն ու եվրոն փոքր-ինչ թանկացել են: Արդյունքում դոլարի փոխարժեքը կազմել է 478 դրամ, եվրոյինը՝ 567, ֆունտինը՝ 633, ռուբլունը՝ 7 դրամ 91 լումա:

Օգոստոսի 4-ին հանրապետությունում սպասվում է առանց տեղումների եղանակ: Օդի ջերմաստիճանն աստիճանաբար կբարձրանա 3-4 աստիճանով: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +23+25, ցերեկը՝ +38+40 աստիճան տաքություն: