Ֆրանսիայում բուրկինիով կնոջն արգելել են օգտվել լողավազանից, հայտնել է Ֆրանսիայում իսլամատյացության դեմ պայքարի կազմակերպությունը։
Դեպքը տեղի է ունեցել Լա Սիոտատ քաղաքում, որտեղ կինը հանգստանում էր ամուսնու հետ։ Հանգստի երկրորդ օրը հյուրանոցի սեփականատերը հայտնել է, որ կնոջն արգելվում է օգտվել լողավազանից, քանի որ այն պետք է չորացնել ու մաքրել այն բանից հետո, երբ կինը լողացել է այնտեղ: Ընդ որում՝ սեփականատերը 490 դոլար է գանձել զույգից՝ որպես լողավազանը մաքրելու վճար։
Կազմակերպությունը հերքում է հյուրանոցի սեփականատիրոջ պնդումը, թե կնոջ լողազգեստը հիգիենիկ չէ։
Բուրկինիի հարցով տարաձայնությունները Ֆրանսիայում սկսվել են անցած ամռանը, երբ մի քանի շրջաններ արգելել են հանրային լողափներում բուրկինի հագնել։
Այդ արգելքները, ի վերջո, չեղարկվել են Ֆրանսիայի գերագույն վարչական դատարանի կողմից, որը հայտնել է, որ դրանք հիմնարար ազատությունների լուրջ խախտում են։
