Իրանի վերընտրված նախագահ Հասան Ռոհանին ընթերցել եւ ստորագրել է իրանցի ժողովրդին եւ իսլամական կարգին հավատարմության երդման տեքստը: Օգոստոսի 5-ին կայացած երդման արարողությանը ներկա են եղել մի շարք երկրների նախագահներ եւ կառավարությունների ղեկավարներ, այդ թվում՝ աշխատանքային այցով Թեհրանում գտնվող Սերժ Սարգսյանը:
Իսկ այսօր Հայաստանի նախագահը հանդիպել է իրանցի պաշտոնակցի հետ: Գործընկերները քննարկել են երկկողմ եւ բազմակողմ փոխգործակցության հարցեր, կարեւորել մի շարք այլ ոլորտներում իրականացվող համատեղ խոշոր ծրագրերն ու նոր եւ հեռանկարային նախագծերը: Հայաստանի եւ Իրանի նախագահներն անդրադարձել են նաեւ տարածաշրջանային անվտանգության խնդիրներին, այդ թվում` ղարաբաղյան հակամարտության բանակցային գործընթացին:
Երեւանում ծնված հնգյակի 4-րդ երեխան նույնպես մահացել է: Փոքրիկ Աննան վերակենդանացման բաժանմունքում էր, բժիշկները ոչ մի կերպ չէին կարողանում նրան դուրս գրել հիվանդանոցից: Երեխան մահացել է մոտ 2 շաբաթ առաջ: Այսպիսով, անկախ Հայաստանի պատմության մեջ ծնված առաջին հնգյակից՝ 4 աղջիկ եւ մեկ տղա, ողջ է մնացել միայն Ռոզան: Նա հիվանդանոցից դուրս է գրվել հուլիսի կեսերին: Հնգյակը ծնվել էր մայիսի 3-ին, խորը անհաս՝ հղիության 28-րդ շաբաթում:
Երեւան-Աշտարակ ավտոճանապարհին տեղի ունեցած ողբերգական վթարից տուժած 4-ամյա երեխան վիրահատվել է: Փոքրիկի վիճակը շարունակում է ծայրահեղ ծանր մնալ. նա դեռեւս կոմայի մեջ է, միացված է արհեստական շնչառության ապարատին: Օգոստոսի 4-ի երեկոյան Երեւան-Աշտարակ ավտոճանապարհին «Ֆոլքսվագեն Պասսատ» մակնիշի ավտոմեքենան բախվել էր «ՎԱԶ 2121» մեքենային: Վթարի հետեւանքով վերջինի վարորդը՝ 36-ամյա Գեղամ Սարգսյանը, տեղում մահացել էր, իսկ նրա 4-ամյա որդին ծանր վիճակում հիվանդանոց տեղափոխվել: Մահվան ելքով վթարի գործով ձերբակալվել է «Ֆոլքսվագեն»-ի 26-ամյա վարորդ Սուրեն Ջեյրանյանը:
Վրաստանի ոստիկանությունը Հայաստանի 22-ամյա քաղաքացու է ձերբակալել: Նա մահացու վրաերթի է ենթարկել մի կնոջ ու նրա երեխային: Հետաքննությունը պարզել է, որ ձերբակալվածը Վրաստանի Սուրամիի շրջանում «Nissan Tiida» մակնիշի մեքենայով վրաերթի է ենթարկել մայթին կանգնած մորն ու երեխային: Կինը 38 տարեկան էր, երեխան՝ 5: Երկուսն էլ տեղում մահացել են: Քրեական գործ է հարուցվել: Եթե վարորդի մեղքը հաստատվի, նա կարող է 6-10 տարի ժամկետով ազատազրկման դատապարտվել:
Վրաստանի իշխանությունները հիմա էլ դիմել են Լեհաստանին՝ խնդրելով տվյալներ հաղորդել Միխայիլ Սահակաշվիլիի գտնվելու վայրի մասին: Նշենք, որ օգոստոսի 3-ին Կիեւն ԱՄՆ-ին, որտեղ գտնվում էր Սահակաշվիլին, եւ մյուս երկրներին տեղեկացրել էր, որ Ուկրաինայի քաղաքացիությունից զրկված Սահակաշվիլիի բոլոր անձնագրերը չեղարկվել են: Հայտնի չէ, սակայն, թե ինչպես է Օդեսայի նախկին նահանգապետն առանց փաստաթղթերի Լեհաստան ժամանել:
Վարշավայի դատախազությունից հայտնել են, որ արդեն միջոցներ են ձեռնարկում՝ պարզելու համար, արդյո՞ք Սահակաշվիլին դեռեւս Լեհաստանի տարածքում է: Վրաստանի դատախազությունն էլ հիշեցրել է, որ հայրենիքում նախկին նախագահի դեմ չորս քրեական գործ է հարուցված, որոնցով նրան մինչեւ 11 տարի ժամկետով ազատազրկում է սպառնում:
Հայաստանի երկու օդանավակայաններում ուղեւորահոսքն այս տարվա առաջին վեց ամիսներին աճել է: Հունվար-հուլիս ամիսներին այն կազմել է 1 մլն 373 հազար 856 մարդ՝ 28%-ով գերազանցելով նախորդ տարվա նույն ամիսների ցուցանիշը: Միայն «Զվարթնոց» օդանավակայանում ուղեւորահոսքն աճել է 24.7%-ով: Հավելենք, որ «Զվարթնոց»-ում եւ «Շիրակ»-ում վեց ամսվա ընթացքում, նախորդ տարվա նույն ամիսների համեմատ, 24.2 տոկոսով ավելացել է նաեւ թռիչքների եւ վայրէջքների թիվը:
Չնայած շատ շոգ եղանակին՝ մայրաքաղաքում շարունակում են տարբեր փառատոններ կազմակերպել: «Երեւանյան ամառ 2017» նախագծի շրջանակում տեղի ունեցավ Yerevan Taraz Fest 2017-ը: Միջոցառման շրջանակում հայկական ապրանքանիշերի հետ միասին ներկայացվեցին նաեւ այլ երկրների ազգային հագուստներ, իսկ միջոցառումն ուղեկցվում էր ազգային երգ ու պարով: Երեկոյի ավարտին իրենց «Այնթապ», «Վերածնունդ» եւ «Արքայից արքա» հավաքածուները ներկայացրեցին հայ դիզայներներ Արամ Նիկոլյանը, Գեւորգ Շադոյանը եւ Լիլիթ Մելիքյանը:
Դոլարն ու եվրոն թուլացել են: Օգոստոսի 7-ին դոլարի փոխարժեքը կազմել է 478 դրամ, եվրոյինը՝ 564, ռուբլունը՝ 7 դրամ 96 լումա, ֆունտինը՝ 624 դրամ:
Օգոստոսի 8-12-ը հանրապետությունում սպասվում է բարձր ջերմային ֆոն: Առանձին հատվածներում մինչեւ +42 աստիճան եւ բարձր հրդեհավտանգ իրավիճակ է սպասվում: Օդի միջին օրական ջերմաստիճանը նորմայից բարձր կլինի 5-7 աստիճանով: Հանրապետությունում, այդ թվում՝ մայրաքաղաքում, օգոստոսի 8-ին տեղումներ չեն սպասվում: Երեւանում գիշերը կդիտվի +25+27, ցերեկը՝ +40+41 աստիճան տաքություն: