«Ժառանգության» անդամներն այս օրերին ոչ պաշտոնական հանդիպումներ են ունենում խորհրդարանական եւ արտախորհրդարանական ուժերի հետ, որ սեպտեմբերից արդեն սկսեն փողոցային պայքարը: Այս մասին NEWS.am-ին ասաց կուսակցության մամուլի խոսնակ Գեւորգ Ղահրամյանը:
«Սեպտեմբերից արդեն պաշտոնական հանդիպումներ կլինեն, իսկ այժմ միայն խորհրդատվական հանդիպումներ են լինում, օրինակ, շփումներ են եղել «Ելք»-ի հետ, «Երկիր Ծիրանիի» հետ: «Ծառուկյան» դաշինքի հետ նույնիսկ կոնսուլտատիվ շփումներ չեն եղել»,- ասաց Գեւորգ Ղահրամանյանը:
«Ժառանգության» մամուլի խոսնակը նշեց, որ իրենք կապը պահպանում են խորհրդարանական ընտրությունների ժամանակ համագործակցած Վարդան Օսկանյանի եւ Սեյրան Օհանյանի հետ: Հարցին՝ կտեսնենք Սեյրան Օհանյանին կրկին քաղաքական գործընթացներում աշնանը, Գեւորգ Ղահրամանյանը պատասխանեց. «Ըստ մամուլում Սեյրան Օհանյանի հայտարարությունների՝ կարծում եմ, որ նույն ընդդիմադիր պայքարի մեջ է մնում եւ ընտրությունների արդյունքներն այքան էլ բան չեն նշանակում իր համար: Կարծում եմ, որ Սեյրան Օհանյանին այս պայքարում կլինի, նրա հետ հանդիպումները, շփումները շարունակվում են, նա էլ իր քաղաքական դիրքորոշումն ու գաղափարները չի փոխել»:
Սեպտեմբերից, ըստ կուսակցության մամուլի խոսնակի, ամենայն հավանականությամբ, կլինի փողոցային պայքար:
«Քննարկվում է այժմ, թե ժողովրդի հետ աշխատելու արդյունքում ինչպես պետք է տաքացնենք, պայքարի մղենք: Իհարկե, ընդդիմադիր ուժերի նախաձեռնությունն է դա, բայց շատ բան ժողովրդից է գալիս»,- ասաց նա:
«Ժառանգության» մամուլի խոսնակը չհստակեցրեց՝ փողոցային պայքարով իշխանափոխության պահանջ են ներկայացնելու, թե ոչ: Գեւորգ Ղահրամանյանը նշեց, որ պահանջները դեռեւս քննարկման մեջ են, սակայն մի բան հստակ է՝ փողոցային պայքարը լինելու է միանշանակ: Հարցին, թե ինչու խորհրդարանական ընտրություններից անմիջապես հետո փողոց դուրս չեկան, կուսակցության ներկայացուցիչը պատասխանեց. «Այս գործընթացը ստեղծվելու հիմնական դրդապատճառը 2018թ. ապրիլին Սերժ Սարգսյանին վարչապետ նշանակվելը թույլ չտալն է: 2017թ.-ի խորհրդարանական ընտրություններից հետո հստակ չէր սա, իսկ ժամանակի ընթացքում պարզ դարձավ, որ իշխող կուսակցությունը մտադիր է Սերժ Սարգսյանին դարձնել վարչապետ, ինչպես գիտեք, «համոզողների» ինստիտուտ է ձեւավորվել: Եվ սրան ընդառաջ այս պայքարն է սկսվելու, որ թույլ չտանք՝ Սերժ Սարգսյանը դառնա վարչապետ: Եթե արտախորհրդարանական եւ խորհրդարանական ուժերը կողմ են մեր նախաձեռնած գործընթացին, ապա համագործակցություն կլինի»:
