Հայաստանի ջրամատակարարման օպերատոր «Վեոլիա ջուր» ընկերությունը դիմել է Հանրային ծառայությունները կարգավորող հանձնաժողովին՝ սակագները բարձրացնելու պահանջով:

NEWS.am-ին ՀԾԿՀ մամուլի խոսնակ Մարիամ Ստեփանյանը հայտնեց, որ հայտը ստացել են օգոստոսի 7-ին՝ աշխատանքային օրվա ավարտին:

«Նախատեսված կարգի համաձայն՝ հայտի ուսումնասիրությանը տրվելու է 80 օր, սակայն մինչեւ այդ 10 օր է սահմանված՝ կամերալ ուսումնասիրության համար, այսինքն պարզելու համար, թե արդյոք կան թերի փաստաթղթեր, նոր լրացուցիչ փաստաթղթեր պահանջելու համար եւ այլն: Դրանից հետո եթե որոշվի հայտը վերցնել ուսումնասիրության, կհաշվարկվի 80 օրը»,- ասաց Մարիամ Ստեփանյանը:

Նշենք, որ «Վեոլիա ջուր»-ը նախկինում ջրով ապահովում էր Երեւանն ու մայրաքաղաքի շրջակայքը, իսկ ամբողջ հանրապետության ջրամատակարարման լիցենզիան ստացել է 2017 թվականի հունվարի 1-ից: Պայմանագրում նշվում է, որ ընկերությունն առնվազն 2 տարի չի կարող սակագների բարձրացում պահանջել: Ներկայում 1 խ.մ. ջուրը 180 դրամ արժե (շուրջ 37 ցենտ): Ընկերությունն առաջարկում է այն հասցնել 194.3 դրամի: Խոշոր բաժանորդների համար սակագինը 54 դրամ է, որն էլ առաջարկվում է հասցնել 58.3-ի: