Արցախի դիրքերից մեկում հոկտեմբերի 15-ի ժամկետային զինծառայող Վահագն Վիրաբյանի սպանության դեպքով հարուցված քրեական գործի նախաքննությունն ավարտվել է:
Ըստ մեղադրանքի՝ ժամկետային զինծառայող Ռազմիկ Խուդավերդյանը դեպքի օրը վիճաբանել է Վահագն Վիրաբյանի հետ: Վիճաբանության ընթացքում Վիրաբյանի կողմից իրեն հայհոյելու համար, վրեժ լուծելու շարժառիթով Խուդավերդյանը լիցքավորել է իրեն ամրակցված ինքնաձիգը և դիատավորությամբ կրակահերթ արձակել ծառայակցի վրա ու սպանել նրան:
Ռազմիկ Խուդավերդյանին մեղադրանք է առաջադրվել Քրեական օրենսգրքի 104-րդ հոդվածի 1-ին մասով: Նա կալանավորված է:
Ավելի վաղ NEWS.am-ը հայտնել էր, որ 2016թ. հոկտեմբերի 15-ին ժամը 08:40-ի սահմաններում N զորամասի պահպանության տեղամասի մարտական դիրքում հերթապահության նշանակված ժամկետային զինծառայող, շարքային Վահագն Վիրաբյանի ուղղությամբ արձակվել են կրակոցներ՝ վերջինիս պատճառելով մահացու հրազենային վիրավորումներ:
Վահագն Վիրաբյանը Եղվարդից էր, տան միակ արու զավակը: Նա շուտով զորացրվելու էր: