Արդեն երկրորդ օրն է՝ հրշեջները Վայոց ձորում պայքարում են անկառավարելի հրդեհի դեմ: Օգոստոսի 10-ի երեկոյան ժամը 7-ին խոտածածկ տարածքում բռնկված հրդեհը տարածվել է մոտ 500 հեկտարի վրա: Աշխատանքներին ներգրավված է 9 մարտական հաշվարկ եւ մոտ 500 մարդ: Հրշեջներին օգնում են ոստիկանական ուժերը եւ մոտակա Արտավան գյուղի բնակիչները: Առաջին անգամ հրդեհը մարելու համար օգտագործվում են մոտակա ջրամբարի պաշարները եւ մասնավոր ընկերության ծանր տեխնիկան: Հրդեհը դեռեւս գյուղին չի սպառնում, բայց կարող է մոտենալ խիտ անտառին։ Հրդեհի առաջացման պատճառը դեռ հայտնի չէ: Մարման աշխատանքները տեղում կառավարում են ԱԻ եւ բնապահպանության նախարարները, ներգրավված է ռազմաօդային ուժերի ուղղաթիռը: Հրդեհի մարման աշխատանքները բարդացնում են քամին եւ տեղանքի բարդ աշխարհագրական դիրքը: Ժամը 21:00-ի դրությամբ դեռեւս չէր հաջողվել մարել կրակը:
Վարչապետ Կարեն Կարապետյանն արձակուրդ է մեկնում. օգոստոսի 15-ից սկսած 4 օր նրան կփոխարինի Միջազգային տնտեսական ինտեգրման եւ բարեփոխումների նախարար Վաչե Գաբրիելյանը: Մինչեւ այդ Կարեն Կարապետյանն օգոստոսի 13-ին երկօրյա աշխատանքային այցով կմեկնի Ղազախստան՝ մասնակցելու Եվրասիական միջկառավարական խորհրդի նիստին:
Քննչական կոմիտեն հայտնել է արտառոց դեպքի մասին. Վրաստանի ադրբեջանական գյուղում Հայաստանու քաղաքացուն 14 տարի պահել են ստրկության մեջ եւ աշխատանքային թրաֆիքինգի ենթարկել: Հայ տղամարդը 2003թ. Վրաստան է գնացել աշխատանք գտնելու, այդ հարցով դիմել է պատահական վարորդի, որն էլ նրան տեղափոխել է ադրբեջանցիներով բնակեցված Սողանլուղ գյուղ, որտեղ ադրբեջանցի ընտանիքի անդամները նրան մինչեւ 2017թ. մայիս պահել են ստրկության վիճակում, առանց վարձատրության աշխատեցրել են եւ պահել անմարդկային պայմաններում: Դեպքը բացահայտելուց հետո տղամարդը տեղափոխվել է Հայաստան:
Երեւանի դատարաններից մեկում շուտով կմեկնարկի ուշագրավ դատական գործ. Հնդկաստանի երկու քաղաքացիներ մեղադրվում են Հայաստան՝ հնդիկների ապօրինի ներգաղթ կազմակերպելու մեջ: Նրանց այդ հարցում օգնել են Հայաստանի քաղաքացի Աննա Էլոյանը եւ կեղծ փաստաթղթեր տրամադրել: Երեքն էլ ստորագրությամբ ազատ են արձակվել:
Սիրիայի կառավարական ուժերը Ռաքքա քաղաքում իսլամիստների ձեռքից ազատել են երկու հայ ընտանիքի: «Իսլամական պետության» կողմից քաղաքը գրավելուց հետո նրանք չեն կարողացել հեռանալ եւ ստիպված են եղել հանդուրժել մշտական ծաղրանքն ու ստորացումները: Իսլամիստները նրանց ստիպել են հսկայական տուրքեր վճարել, իսկ կանանց՝ գլխաշոր կրել:
Վերջին տարիներին կտրուկ աճել է Գրին քարտի վիճակագրությանը մասնակցող հայաստանցիների թիվը. եթե 2010թ. «ամերիկյան երազանքի» վիճակախաղին մասնակցել է ընդամենը 20 հազար մարդ, ապա 2015թ. նրանց թիվը եղել է 56 հազար: Չնայած դրան, վիզա ստացածների թիվը չի աճել: Նշենք, որ ամեն տարի Գրին քարտի վիճակահանությանը խաղարկվում է ընդամենը 50 հազար վիզա ամբողջ աշխարհի համար:
Ամերիկյան Սենթ Լուիս քաղաքում անցկացվող Sinquefield Cup սուպերմրցաշարը մոտենում է ավարտին. վերջին տուրը օգոստոսի 11-ին է, երբ կորոշվի մրցաշարի հաղթողը: Երեք հավակնորդներից մեկը Լեւոն Արոնյանն է, որը առաջատար հորիզոնականը կիսում է նույն միավորներն ունեցող Վիշվանաթան Անանադի եւ Մաքսիմ Վաշյե-Լագրավի հետ: Արոնյանի այսօրվա մրցակիցը Մագնուս Կարլսենն է, որը, սակայն, ունի չորս ու կես միավոր: Վճռորոշ հանդիպումից առաջ Արոնյանը հարցազրույց է տվել լրատվամիջոցներին, որում մանրամասներ է պատմել դեպի շախմատային Օլիմպոս տանող ճանապարհին ունեցած դժվարությունների մասին: Գրոսմայստերը հիշել է, որ 23 տարի առաջ, երբ նվաճեց իր առաջին տիտղոսը միջազգային մրցաշարում, Հունգարիա էր մեկնել մոր հետ, սակայն, հյուրանոցի համար գումար չունeնալու պատճառով ամբողջ մրցաշարի ընթացքում մայրն ապրել է ավտոբուսում: Նշենք, որ իր վերջին հաղթանակից հետո Արոնյանի վարկանիշը բարձրացել է եւ նա կրկին աշխարհի երկրորդ շախմատիստն է Մագնուս Կարլսենից հետո:
Ի դեպ, հայկական շախմատի առաջատարը նաեւ ասել է, որ ամուսնանալու է աշնանը։ 34-ամյա Արոնյանի եւ նրա ընտրյալի՝ ֆիլիպինուհի Արիանայի հարսանիքը տեղի կունենա սեպտեմբերի 30-ին Երեւանում։
Եվրոյի փոխարժեքը մեկ օրում աճել է երկու դրամով եւ կազմել 562 դրամ: Դոլարը, ֆունտը եւ ռուբլին աննշան էժանացել են՝ կազմելով համապատասխանաբար 478, 620 եւ 7.95 դրամ:
Օգոստոսի 12-14-ը Հայաստանում ջերմաստիճանը նորմայից 4-5 աստիճանով բարձր կլինի: 15-ից սկսած ջերմաստիճանը կնվազի 5-6 աստիճանով: Վաղը մայրաքաղաքում սպասվում է ցերեկը՝ մինչեւ 39, գիշերը՝ մինչեւ 25 աստիճան տաքություն: