Ջավախքի Ախալքալաք քաղաքի ու մյուս բնակավայրերի բնակիչներին, որոնք հիմնականում հայեր են, սկսել են վրացերեն սովորեցնել, ասվում է Վրաստանի կրթության ու գիտության նախարարության մամուլի ծառայության հաղորդագրության մեջ, հաղորդում է «Sputnik-Վրաստանը»։
Դասընթացները կազմակերպելու է Զուրաբ Ժվանիայի անվան պետական դպրոցը՝ Ախալքալաքում Հայ Առաքելական եկեղեցու նախաձեռնությամբ։
Վրաստանի կրթության ու գիտության փոխնախարար Լիա Գիգաուրին հայտնել է, որ Ժվանիայի անվան դպրոցը պատրաստել է 130 շարժական խմբեր Ջավախքի համար, որպեսզի նրանք ուղեւորվեն այն վայրեր, որտեղ կա վրացերենի ուսուցման պահանջ։
Ախալքալաքում, որտեղ հայերը կազմում են բնակչության 80 տոկոսը, շատերն ընդամենը կենցաղային մակարդակի վրա են տիրապետում պետական լեզվին։ Դա նրանց խանգարում է ինտեգրվել վրացական հասարակությանն ու դառնալ իրենց երկրի լիարժեք քաղաքացիներ։ Փորձագետները վստահ են, որ նոր դասընթացների շնորհիվ այդ իրավիճակն արմատապես կփոխվի։ Ըստ բնակչության մարդահամարի, որը իրականացվել է 2014-ի նոյեմբերին, Վրաստանում ապրում է 168․1 հազար հայ։
