Վրաստանի ԿԳՆ-ի որոշումը՝ Ջավախքում 130 շարժական խումբ ստեղծելու եւ վրացերեն ուսուցանելու մասին, հայերին ինքնությունից զրկելու նպատակ է հետապնդում: NEWS.am-ի հետ զրույցում այս մասին ասաց «Վիրք» չգրանցված կուսակցության համանախագահ Դավիթ Ռստակյանը: Նրա խոսքով՝ Վրաստանի իշխանություններն այս քայլով ջավախքցիներին ոչ թե հնարավորություն են տալիս, այլ պարտադրում են սովորել պետական լեզուն:
«Ենթադրենք՝ վրացերենին տիրապետեցին, դրանից ի՞նչ է փոխվելու: Վրաստանում ապրող հայերի կեսից ավելին տիրապետում է վրացերենին, բայց դրանից նրանց կյանքում ի՞նչ է փոխվել: Թող մեկը կանգնի եւ ասի, որ վրացերեն սովորելուց հետո իր կյանքում ինչ-որ բան է փոխվել, աշխատանք է գտել, իմաստը ո՞րն է: Դա ընդամենը գործիք է՝ ջավախահայերին ինքնությունից զրկելու»,- ասաց նա:
Դավիթ Ռստակյանի խոսքով՝ Վրաստանում դրա նախադեպն արդեն եղել է. «Կախեթիում ապրող հայերը պետական լեզուն սովորեցին՝ արդեն չկան, Գորիում սովորեցին՝ չկան, Թբիլիսիում սովորեցինք՝ կիսով չափ չկանք: Ես կարծում եմ, որ պետական լեզու ասվածն օգտագործվում է՝ հայերին իրենց ինքությունից օտարացնելու համար: Եթե հայը լավ տիրապետի իր լեզվին, նաեւ սովորի վրացերեն, դա միայն ողջունելի է, բայց այս դեպքում հակառակ ուղղությամբ են աշխատում վրաց իշխանությունները: Ստացվել է այնպես, որ մենք Վրաստանի իրավասության տակ ենք հայտնվել եւ հիմա լեզվի ուսուցումը պարտադրանք է պարզապես մեզ համար, սա հակահայկական երեւույթ է»,- ասաց նա:
Դավիթ Ռստակյանի խոսքով՝ վրաց իշխանությունների հայտարարությունները, թե ջավախքցիները չեն տիրապետում պետական լեզվին եւ այդ պատճառով է, որ չեն ինտեգրվում վրաց հասարակությանը, աշխատանք չեն կարողանում գտնել, միայն արդարացումներ են եւ ստահոտ հայտարարություններ. «Սահակաշվիլիի ժամանակ Ախալքալաքում աշխատանքի էին ընդունվում նրանք, որոնք վրացերեն չգիտեին, բայց դավաճանում էին հայերին»:
Ավելի վաղ տեղեկացրել էինք, որ Ջավախքի Ախալքալաք քաղաքի ու մյուս բնակավայրերի բնակիչներին, որոնք հիմնականում հայեր են, սկսել են վրացերեն սովորեցնել: Վրաստանի կրթության ու գիտության նախարարության մամուլի ծառայությունը հայտարարել է, որ Ժվանիայի անվան դպրոցը պատրաստել է 130 շարժական խմբեր Ջավախքի համար, որպեսզի նրանք ուղեւորվեն այն վայրեր, որտեղ կա վրացերենի ուսուցման պահանջ։
