Այնուամենայնիվ, Թուրքիան Հայաստանին զենք չի վաճառում ու չի զինում, իսկ Ռուսաստանը դա անում է, ընդամենն այդ մանրուքն ավելացնեմ, եթե դա մանրուք է: Այս մասին «Ազատություն» ռադիոկայանի «Կիրակնօրյա վերլուծական Թամրազյանի հետ» հաղորդման եթերում ասել է արտաքին գործերի փոխնախարար Շավարշ Քոչարյանը՝ անդրադառնալով Թուրքիայի կողմից Ադրբեջանին զինելու ու պաշտպանելու քաղաքականությանը:
Նրա խոսքով, այս ամբողջ պատկերն իրական գործընթաց է, որը միշտ իրականացրել եւ շարունակում է իրականացնել Ադրբեջանը, բայց մյուս կողմից այդ ամենում կա նաեւ քարոզչական տարր. «Մենք պետք է ելնենք մի հանգամանքից, որ առայսօր ԼՂ հարցի լուծման հետ կապված Ադրբեջանի քաղաքականությունը մնում է ուժային, ի սկզբանե որդեգրել էր ուժային քաղաքականությունը եւ շարունակում է նույնը, որը մի կողմից ուղղված է միջնորդներին շանտաժի ենթարկելուն՝ «կա՛մ մեր ուզածը մեզ սկուտեղի վրա մատուցեք, կա՛մ էլ տեսեք, կարող են վերսկսվել ռազմական գործողությունները»: Սա մենք վաղուց արձանագրում ենք եւ պետք է պատրաստ լինենք ցանկացած սադրանքի»:
Անդրադառնալով նրան, որ Թուրքիան օգնում է հենց Նախիջեւանին եւ ուժեր է կուտակում այնտեղ՝ հիմնվելով Ղարսի պայմանագրի վրա, ըստ որի նա Նախիջեւանի անվտանգության երաշխավորներից է, Շավարշ Քոչարյանն ասել է, որ կարեւոր չէ, թե որ հատվածում է տեղի ունենում ուժերի կուտակումը:, իսկ Ադրբեջանն ամենուրեք է կուտակում ուժերը. «Դա վերաբերում է եւ՛ Տավուշի շրջանին, եւ՛ ամբողջ Արցախի Հանրապետության սահմանին: Այնպես որ, մենք պետք է պատրաստ լինենք ոչ միայն համարժեք, այլ նաեւ ասիմետրիկ պատասխան տալու»:
Դիտարկմանը, որ այնպիսի դաշնակից, ինչպիսին Թուրքիան է Ադրբեջանի համար, Հայաստանը չունի, ԱԳ փոխնախարարն արձագանքել է, ո դա գաղտնիք չէ. «Թուրքիան վաղուց է հայտարարել, որ իրենք մեկ ժողովուրդ, երկու պետություն են: Այստեղ տարօրինակ բան չկա, որ իրենք այսքան սերտ դաշնակից են: Նույնիսկ արյունակցական, ազգային կապ կա: Այդ բոլորը տրամաբանական է: Այդ տեսակետից ակնկալել, որ որեւէ այլ պետություն, ով ուզում է լինի, նույնքան կարող է մտերիմ լինել Հայաստանի հետ, կլինի մի քիչ չափազանցված»:
Քոչարյանի խոսքով, այլ բան է, որ Հայաստանն իր հույսը պետք է կապի ոչ թե մեկ պետության հետ, այլ պետք է կարողանա իր հարաբերությունները դիվերսիֆիկացնել տարբեր ուժային կենտրոնների, տարբեր պետությունների, միջազգային կազմակերպությունների հետ:
«Ադրբեջանի քաղաքականությունը բոլորին հոգնեցրել է: Հոգնեցրել է Մինսկի խմբի համանախագահներին, հոգնեցրել է հենց այդ երեք միջնորդ պետություններին: Չմոռանանք, որ երեքն էլ ՄԱԿ-ի անվտանգության խորհրդի մշտական անդամ են: Վերջիվերջո, նրանց կոչերը մի ուղղությամբ են, Ադրբեջանի գործողություններն՝ այլ ուղղությամբ»,- ընդգծել է Հայաստանի ԱԳ փոխնախարարը: