Հայաստանում կեղծ դիպլոմի ստացման եւ օգտագործման հերթական դեպքն է բացահայտվել:
Պարզվում է՝ ՀՀ քաղաքացի Նունե Հ.-ն մորաքրոջ որդուց ձեռք է բերել իր տվյալներով ՌԴ Մոսկվայի Սեչենովի անվան բժշկական ակադեմիայի դեղագետի որակավորման կեղծ ավարտական դիպլոմ, որն էլ այս տարվա հունվարին ներկայացրել է Երևանի Մխիթար Հերացու անվան պետական բժշկական համալսարան` «դեղագիտություն» առարկայի վերապատրաստման դասընթացներին մասնակցելու համար: Գործով արդեն նախաքննության ավարտ է հայտարարվել:
Նշենք, որ ներկայումս դատաքննության կամ նախաքննության փուլում են գտնվում կեղծ դիպլոմներ տրամադրելու կամ ձեռք բերելու տարբեր գործեր: Ըստ ԱԱԾ-ի տվյալների՝ ՀՀ կրթության եւ գիտության նախարարության կողմից հավատարմագրված ու Երեւան քաղաքում եւ մարզերում գործող որոշ ոչ պետական ԲՈՒՀ-երի ռեկտորներ շահադիտական դրդումներով կեղծ ավարտական դիպլոմներ են հատկացրել դասընթացներին չմասնակցած, իսկ առանձին դեպքերում՝ նաեւ ընթացիկ ու ավարտական քննություններին չներկայացած անձանց։ Հատկանշական է, որ կեղծ դիպլոմները տրամադրվել են ոչ միայն Հայաստանի Հանրապետության, այլեւ օտարերկրյա, այդ թվում՝ Իրանի, ԱՄՆ-ի, Վրաստանի, ՌԴ-ի, Ուզբեկստանի եւ Իսրայելի մի քանի տասնյակ քաղաքացիների, որպիսի պայմաններում իրական են եղել թե նոր իրավախախտումների կատարման, եւ թե այլ անբարենպաստ հետեւանքների առաջացման ռիսկերը:
Կեղծ դիպլոմներ տրամադրելու մեջ մեղադրվող՝ Հայաստանում գործող ոչ պետական մի քանի բուհերի ռեկտորներ արդեն իսկ դատարանի որոշմամբ մեղավոր են ճանաչվել եւ տուգանվել:
