Արմավիրի մարզի Ջրառատ գյուղում մարտի 14-ին զենքի գործադրմամբ տեղի ունեցած միջադեպի գործով դատավճիռ է կայացվել:
Արմավիրի մարզի ընդհանուր իրավասության դատարանում գործով ամբաստանյալ Տիգրան Սարգսյանը միջնորդել է դատաքննությունն անցկացնել արագացված կարգով՝ հայտարարելով, որ ընդունում է իրեն առաջադրված մեղադրանքը:
Առաջին ատյանի դատարանը Սարգսյանին մեղավոր է ճանաչել եւ դատապարտել 1 տարվա պայմանական ազատազրկման:
Ավելի վաղ հայտնել էինք, որ 2017թ. մարտի 14-ին` ժամը 14-ի սահմանում, Արմավիրի մարզի Ջրառատ համայնքի Թաթուլ Խաչատրյանի անվան միջնակարգ դպրոցի աշակերտների միջեւ տեղի ունեցած վիճաբանության հետ կապված հարցերի պարզաբանման նպատակով գյուղի համայնքապետարանի մոտ հանդիպել են նրանց հարազատները եւ կողմնակիցները։
Վիճաբանությունը վերածվել է քաշքշոցի, որի ժամանակ գյուղապետի տեղակալ Տիգրան Սարգսյանը այլ անձանց հետ միասին ծեծի է ենթարկել Մելիք Մելքոնյանին, Հակոբ Մելքոնյանին եւ անչափահաս Արայիկին, արձակել կրակոցներ, ինչի հետեւանքով Մելիք Մելքոնյանի առողջությանը պատճառվել է թեթեւ վնաս, Հակոբ Մելքոնյանին եւ անչափահասին՝ միջին ծանրության վնաս:
Միջադեպին մասնակցել է նաեւ փոխոստիկանապետ Լեւոն Երանոսյանը, որը երեւում է նաեւ միջադեպի վերաբերյալ տեսանյութում: Միջադեպի ժամանակ Լեւոն Երանոսյանի եղբայրը՝ Լեռնիկ Երանոսյանը փակ գանգուղեղային տրավմա էր ստացել:
