Աստանայում վարչապետների եւ ԵՏՄ անդամ երկրների նախարարների վերջին հանդիպումից հետո Հայաստանում ԵՏՄ-ի շրջանակում տնտեսական հարաբերություններին նորովի զարկ տալու ցանկություն է ծագել։ Այս մասին օգոստոսի 15-ին լրագրողների հետ հանդիպման ժամանակ հայտարարեց Հայրենական ապրանքարտադրողների միության նախագահ Վազգեն Սաֆարյանը։
Նա հստակեցրեց, որ խոսքը հիմնականում մեքենաշինության ոլորտի զարգացման մասին է։ «Ռուսական մեքենաշինության միությունը, ինչպես նաեւ Բելառուսի եւ Ղազախստանի նման կազմակերպությունները համակարգող խորհուրդ են ստեղծել, որը գործում է ԵՏՄ-ի շրջանակում։ Տվյալ խորհրդի հաջորդ նիստը ծրագրվում է անցկացնել սեպտեմբերին, Հայաստանում»,-ասաց Սաֆարյանը՝ հավելելով, որ կքննարկվեն մեքենաշինության ոլորտի զարգացման հետ կապված հարցերը՝ ԵՏՄ –ի արդյունաբերական քաղաքականության համատեքստում։
Նա նշեց, որ ԵՏՄ երկրների հետ Հայաստանի տնտեսական կապերը բավական արդյունավետ չեն գործում եւ սեպտեմբերին Հայաստանում նախատեսված հանդիպումը դրութունը փոխելու համար լավ հարթակ կդառնա։ Փորձագետը հավելեց, որ երբ խոսքը մեքենաշինության մասին է, նկատի է առնվում ոչ միայն ավտոմեքենաների կառուցումը, այլեւ հաստոցաշինությունը։
