Օգոստոսին Հայաստանից Ռուսաստան ավիատոմսերը կտրուկ թանկացել են: Ընդ որում, թանկացել են ամենամեծ պահանջարկը վայելող Երևան-Մոսկվա, Երեւան-Սոչի ուղղությամբ ավիատոմսերը: «Վեռում թրեվլ» ընկերության աշխատակիցը NEWS.am-ի հետ զրույցում նշեց, որ ամռան ընթացքում Ռուսաստանից եկած մեծ թվով հայերն այժմ վերադառնում են եւ հենց դրա հետ կապված էլ թանկացումներ են նկատվում. «Օգոստոսի 15-20-ի հատվածում Երեւան-Մոսկվա ավիատոմսերն արժեն 98 հազար, նախկին 68-70 հազար դրամի փոխարեն»:
«Պարտեզ տուրի» ներկայացուցիչն էլ նշեց, որ չնայած այս ուղղությամբ ավիատոմսերը կտրուկ թանկացել են, այս պահի դրությամբ համարյա բոլոր տոմսերն ամրագրված են: Աշխատակցի խոսքով, եթե հուլիսին Երեւան-Մոսկվա տոմսն արժեր մինչեւ 68 հազար դրամ, այժմ այն կրկնակի, եռակի անգամ թանկացել է՝ հասնելով մինչեւ 160 հազար դրամի, թանկացել են նաեւ Երեւան-Պետերբուրգ, Երեւան-Սոչի ուղղությամբ ավիատոմսերը, անգամ Երեւան-Կիեւ՝ հասնելով մինչեւ 140 հազար դրամի: Ընկերության աշխատակցի խոսքով, սեպտեմբերի 1-ից ավիատոմսերը կէժանանան՝ հասնելով նախկին գնին:
Նշենք, որ Ռուսաստան-Հայաստան ավիատոմսերի թանկացում չի նկատվել: