Այս պահին «Խոսրովի արգելոց» պետական արգելոցում անձրեւ չկա, օդային օպերացիաներից հետո եւ տեղացած անձրեւը բավականին արդյունք տվել են: Այս մասին նշել է Բնապահպանության նախարարի մամուլի խոսնակ Մարինե Կարապետյանը՝ նշելով, որ իրեն այդ մասին հաղորդել է «Խոսրովի անտառ» պետական արգելոցի տնօրեն Հրաչյա Հովակիմյանը:
«Ներկայում հրդեհաշիջման աշխատանքների բոլոր մասնակիցները կրկին գործի են անցել տեղայնացված հրդեհի օջախները մարելու նպատակով: Ըստ ՀՀ ԲՆ Կենսառեսուրսների գործակալության բնության հատուկ պահպանվող տարածքների եւ դենդրոպարկերի կառավարման բաժնի պետ Արամ Աղասյանի՝ խոշոր կաթնասունները, թռչունները չեն տուժել եւ արգելոցի այլ տարածքներ են տեղափոխվել, հիմնականում չթռչող միջատները , սողունները, կրծողներն են տուժել հրդեհից:
Սրանք նախնական տվյալներն են, հիմնական ուսումնասիրությունները եւ հաշվարկները կկարտարվեն արդեն հրդեհաշիջման աշխատանքների ամբողջական ավարտից հետո: Աղասյանը պարզաբանել է , որ հրդեհն ընդգրկած 2,5-3 հազար հա գոտում անգամ կան տարածքներ՝ ավազուտներ, կղզյակներ, որտեղ կենդանիները կարող էին պատսպարվել կրակից»:
Ավելի վաղ Վայրի բնության համաշխարհային հիմնադրամի (WWF) հայաստանյան մասնաճյուղի տնօրեն Կարեն Մանվելյանը, aravot.am-ի հետ զրույցում նշել էր. «Խոշոր կաթնասունները, հաստատ, փախել են, նրանք չեն այրվել, ուղղակի սթրեսային վիճակում են: Մեզ պատմեցին, որ արջի քոթոթը դուրս էր եկել ու հարձակվում էր հրդեհը հանգցնողների վրա, արգելոցի աշխատակիցների, որովհետեւ կորցրել էր մորը, բայց կգտնեն իրար, հենց ծուխը նստի, քոթոթն ու մայրը կգտնեն իրար: Քարայծը, լուսանը, գորշ արջ, նրանք կփրկվեն, հիմա նրանք կողքի տարածքներն են գնացել: են Հավանաբար, այրվել մանրները, կրծողները, սողունները, միջատները: Նապաստակներն էլ»:
