Հայաստանում ինֆլյացիան տարեկան միջինը 6 տոկոս է կազմում: Այս մասին օգոստոսի 16-ին՝ լրագրողների հետ հանդիպման ժամանակ ասաց Հայաստանի Սպառողների ասոցիացիայի նախագահ Արմեն Պողոսյանը:
Փորձագետը նշեց, որ մասնավորապես սննդամթերքի եւ առաջին անհրաժեշտության ապրանքների գները երկրում պրոգրեսիվ արագությամբ են աճում: «Եթե նայենք վերջին 3 տարիների կտրվածքով, ապա սննդամթերքը 20 տոկոսով թանկացել է: Ըստ որում՝ թանկանում են բոլոր մթերքները»,- պարզաբանեց Պողոսյանը՝ միաժամանակ հավելելով, որ ընդհանուր առմամբ գնաճը բնական տնտեսական գործընթաց է, որը չի կարելի կանգնեցնել:
Հայաստանի Սպառողների ասոցիացիայի նախագահի կարծիքով՝ խնդիրը միայն այն է, որ սննդամթերքի եւ հատկապես առաջին անհրաժեշտության ապրանքներին գնաճի հետ միաժամանակ պետք է աճեն նաեւ քաղաքացիների աշխատավարձերի եւ թոշակների չափերը, ինչը չափազանց դանդաղ տեմպերով է տեղի ունենում: Նրա խոսքով՝ եթե երկրում սննդամթերքի գները բարձրանում են, սակայն դրա հետ միաժամանակ տեղի է ունենում բնակչության եկամուտների զգալի աճ, ապա տեղի ունեցողը կարելի է գնահտել ոչ թե որպես բացասական երեւույթ, այլ որպես հասարակության ընդհանուր բարեկեցության բարելավում: «Իսկ Հայաստանում հակառակ գործընթացն է ընթանում: Մեզ մոտ ի պատասխան գների զգալի աճի՝ տեղի չի ունենում բնակչության եկամուտների համարժեք եւ համաչափ աճ: Եկամուտներն աճում են ուղղակի ծիծաղելի տեմպերով»,- եզրափակեց Արմեն Պողոսյանը: