Քրեական գործի շրջանակում «Թուրան» գործակալությունում ստուգումներ են տեղի ունենում։ Այս մասին ասել է տեղեկատվական գործակալության տնօրեն Մեհման Ալիեւը, հաղորդում է minval.az-ը։
Նրա խոսքով՝ «Թուրանը» մեղադրվում է խոշոր գումարի հարկերից խուսափեու մեջ, եւ ներկա պահին գրասենյակում ստուգումներ են տեղի ունենում։ «Մեզ մեղադրում են հարկերից խուսափելու մեջ։ Ավտոմատ կերպով ստուգումներ են սկսվել։ Մենք գիտենք՝ ինչպես է Ադրբեջանում տեղի ունենում այդ գործընթացը։ Արդյունքը կանխատեսելը եւս դժվար չէ։ «Թուրան»-ը կարող են փակել։ Բնականաբար, այդ գործընթացը կարող է տեղի ունենալ ապօրինի գործողությունների արդյունքում»,-ասել է նա։
Մեհման Ալիեւը հերքել է ենթադրությունը, որ ճնշումը կարող էր սկսվել «Թուրան»-ում որեւէ հոդվածի կամ տեղեկության պատճառով։ Նույն բանն Ալիեւը կարող է ասել ռուսալեզու contact.az կայքի մասին, որը եւս ինքն է ղեկավարում։ Նա նշել է, որ երկրում ազատ մամուլ հասկացություն արդեն գոյություն չունի։
«Բոլորին ու ամեն ինչ վերահսկողության տակ են վերցնում։ Այժմ նրանք ցանկանում են ամբողջական վեահսկողություն սահմանել։ Նախ կվերցնեն փաստաթղթերը, իսկ հետո...Շարունակությունը դասական կլինի։ Ադրբեջանում միշտ այդպես է։ Սկզբում քրեական գործ են բացում, հետո ստուգումներ անցկացնում, դրան հաջորդում է փաստաթղթերի վերստուգումը»։